【周末遊懶人包】 蘆葦草 +美食+日落 鹿頸谷埔超易行!

涼意漸濃,又到咗行山季節!想親親大自然、又想食、重想影靚相呃Like?去谷埔就可以一次過滿足你三個要求!芒草?谷埔無!一片片的蘆葦田 蘆葦草 ,又吸唔吸引到你?訊號?谷埔都無!一於遠離煩囂,逃去世外「蘆葦」園!

建議唔好食早餐去,因為一落小巴就有兩間士多,分別係BB開心士多同陳鳳記!BB開心士多最出名係鹽焗雞飯($40),麵食係$25-30,記者反而比美式早餐吸引著,包埋橙汁都只係$38,加$2有多塊薯餅!抵啊!

 

食飽飽就上路喇!由新娘潭路向停車場方向行,見到發記士多同往雞谷樹下個牌就轉左。去到發記士多,望向左邊有個位寫住「行人路」,向個邊行,正式出發!

之後會上一條樓梯,有個小草坪,再落番樓梯,行多陣就差唔多到鳳坑村。

鳳坑村有間盈佳茶座可以補給,亦有全程唯一見到的公廁 – 鳳坑村公廁。

最期待的畫面終於出現喇!一大片蘆葦草園,出現喇!留意番,成個地都係泥水,唔好行入去。

見到蘆葦草轉右行多大概15分鐘,終於比記者搵到同蘆葦草的影相位!

 

谷埔

路線:鹿頸-鳳坑-谷埔
時間:約1個半小時
難度:✭✩✩✩✩
前往方法:由粉嶺火車站C出口坐56K小巴到鹿頸總站
備註:小巴尾班車19:30;鹿頸到谷埔有五間士多;鳳坑村則有公廁

延伸閱讀:

【周末遊懶人包】秋日限定!馬鞍山芒草遊 睇埋礦村秘景!
【周末攻略】呃like之選 5大日落靚景!

最新吃喝玩樂資訊