放假好去處！九龍灣逾3萬呎空中花園 必影10米巨型哥基
突破傳統展覽框架 聯乘本地藝術家打造社區企劃
位於MegaBox頂層18樓的「Mega Sky」空中花園佔地逾3萬平方呎，採用全透視落地玻璃設計，以270度無遮擋全景視野，一次睇晒東九龍及維多利亞港嘅靚景。今次MegaBox 夥拍本地藝術平台 Art Dreamers，攜手呈獻全港首個結合巨型狗狗壁畫與立體裝置嘅社區藝術企劃「Mega Art Space」。企劃特別邀得擁有近 30 年藝術教學經驗嘅資深藝術家李學鋒老師親臨現場，創作多幅以貓狗為主題嘅巨型壁畫，當中包括長達 5 米、現場即席揮毫嘅巨型貓狗畫作。李老師筆下嘅可愛哥基更配上立體充氣尾巴裝置，搖身一變成為「破壁而出」嘅半立體藝術創作，打破平面界限。同場更展出多幅幼稚園至中學生繪畫比賽嘅得獎作品，讓大眾一同感受藝術創作嘅樂趣。
10米巨型哥基「Mochi 麻糬」震撼登場
講到今次企劃入面最吸引嘅打卡位，絕對非呢隻超級吸睛嘅巨型哥基莫屬！MegaBox 將李老師筆下嘅哥基帶出畫框，化身成為闊達 10 米嘅巨型充氣裝置「Mochi 麻糬」，震撼進駐 Mega Sky 空中花園！巨型 Mochi 麻糬嘅像真度極高，連毛髮質感都非常逼真，塊面仲掛住開朗趣致嘅神情，靜靜地坐鎮喺空中花園中央等大家嚟搵佢影相。Mochi 麻糬最鍾意就係瞓喺草地上打盹嘆太陽，大家可以喺寬敞嘅草坪上同佢一齊共度悠閒時光。當黃昏夕陽餘暉灑落，Mochi 麻糬與漫天變幻嘅「鹹蛋黃」晚霞及維港美景同框，畫面真係超級治癒動人，各位愛狗人士萬勿錯過！
夜間限定戶外夢幻寵物光影匯演
除咗日頭可以同巨型哥基瘋狂影相之外，Mega Sky 入夜後同樣充滿驚喜！每晚呢度都會上演戶外大型貓狗寵物主題光影匯演，將成個空中花園幻化成童話般嘅夢幻樂園。可愛嘅貓貓狗狗會以巨型光影形態驚喜登場，光影仲會跟隨住悅耳嘅音樂節奏不斷變幻，時而夢幻繽紛，時而溫馨療癒，為大家帶嚟沉浸式嘅視聽體驗。配合埋 Mega Sky 璀璨嘅維港夜景，打卡效果一流，大小朋友見到都必定樂而忘返！
日夜景致各有特色 啱晒一家大細同寵物放電
想一次過玩盡 Mega Sky 嘅日與夜？建議大家可以先去 MegaBox 行街 Shopping 同食晏，到黃昏時分上 18 樓同 10 米巨型哥基「Mochi 麻糬」以及各幅巨型貓狗壁畫打卡，順便欣賞維港無敵日落靚景！入黑之後就可以留低欣賞埋萌爆嘅戶外寵物光影匯演，感受日夜交織嘅雙重驚喜。MegaBox 本身亦係九龍東嘅寵物友善商場，無論係一家大細享受親子時光、情侶拍拖，定係帶埋主子毛孩去草坪放電都非常適合，包保大家度過一個輕鬆愉快嘅週末！
活動詳情：
10米闊巨型哥基「Mochi 麻糬」
展出日期：即日至 2026 年 10 月 4 日
時間：
星期一至五：下午 1 時至晚上 10 時
星期六、日及公眾假期：上午 11 時至晚上 10 時
地點：MegaBox L18 Mega Sky 空中花園
費用：免費入場
室外大型貓狗寵物主題光影匯演
日期：即日至 2026 年 9 月 13 日
時間：晚上 7 時 30 分至 9 時（或因應天氣及現場情況而作出更改）
地點：MegaBox L18 Mega Sky 空中花園
費用：免費入場
