免費試食係必需？店主拒提供免費餃子被西客鬧爆｜飲食熱話

撰文：Evita ｜圖片：新傳媒資料庫、爆怨公社

台灣餃子女店主 分享西客要求免費試食經歷

有台灣女網民喺爆怨公社Facebook發文，表示自己係手工餃子網店老闆，有日收到客人詢問水餃價錢、口味同可以幾時拎貨。

老闆：「非常不好意思，因為本月的單都滿了！可能需要幫您安排在下個月唷！」

客人：「賣這麼貴，還要排隊喔？」

客人要求免費試食

老闆指餃子大粒又飽滿，$4.5一粒絕對有價值，建議客人可以預訂，點知客人就話：「沒吃，怎麼知道好不好吃？」更問到底係有幾大粒。

老闆影咗兩張餃子相比客人睇後，客人就話自己同餃子店都係位於嘉義市，要求老闆送十隻餃子比佢試吓。

拒提供餃子試食 被西客鬧爆

客人：「我說你送十個來我試吃看看，沒吃過怎知道好不好吃？又怎知道是不是真的大顆？」

不過老闆話店舖無提供免費試食服務，更向客人道歉。但係客人就話其他店都會提供試食，反問係咪因為太難食所以唔畀試。

西客：唔使打悲情牌！

客人解釋自己只係家庭主婦，靠賣餃子分擔家計，無理由每個客人都提供試食，不過客人完全唔理，仲話：「唔使打悲情牌。」

老闆最終忍唔住，叫客人如果唔鍾意就另搵賣家。

客人：「正有此意，給妳機會妳不要。」面對如此野蠻嘅客人，老闆都依然向客人致歉。

網民睇完之後都戥老闆唔抵，更話客人臉皮厚過犀牛皮，連網購小店都想拎試食著數；有人認為該名客人係騙子。如果大家係餃子店老闆，你哋又會點應對呢類客人呢？

圖片：新傳媒圖片庫、爆怨公社