美團外賣App價格被指歧視？網民揭用香港電話訂餐價格翻倍 附最新回應

網民揭用香港電話訂餐價格翻倍

有網民就在Facebook上，分享如何用美團KeeTa App叫外賣「最抵」。該用戶詳細描述了他的經歷，他在朋友家用自己的手機點餐時，發現價格異常。「我點完啲嘢要300幾，我fd問我做咩點咁貴，後尾佢睇咗我電話發現用我電話點嘅嘢貴一倍，咁就即刻幫我退款但點知商家拒絕，我哋用其它電話點都係平我一倍，我哋得出咗個結論你用香港電話綁微信綁美團就算你係俾人仔，佢都會收貴你一倍錢」。

事件引起了他的疑惑和不滿，但美團方面的回應卻讓他感到無奈。「最後美團俾我嘅答案就係無答案，話境外電話過唔到安全驗證，過唔到你接咩單？姐係境外電話就係唔安全？咁我問佢係咪好多境外電話都係唔知道嘅情況下一直收多一倍佢唔答！」他進一步解釋：「打咗幾個電話俾我每次都係話處理唔到，佢哋無人處理到，一直係咁拖，我都無叫佢退返之前嗰啲，但呢兩單我係即刻取消都唔俾退，仲要係咁cut我線！如果我fd無發現我都唔知一直原來俾咁高嘅價錢，我睇返以前記錄原來一直都係咁樣收！」。

網民反應兩極：內地電話才有特價

帖文引來網民留言，並提出不同的疑問，「淨系美團外賣唔同價？還是用美團買堂食套餐都唔同價？」，也有網民反映意見指「早幾個月都冇呢個問題，依家發現佢見你非大陸號碼就會加貴」。此外有網民質疑事主，「邊有人唔用大陸電話叫美團架」。不少網民也趁機分享經驗，「唔怪得上次網上訂花，內地電話是特價，香港電話是正價，係貴1倍」。

其他網民分享：

• 「多謝你無懼其他網友嘅抨擊勇於將你自己嘅事講出嚟，其實真係好想講一句，人哋公開分享自己嘅事，你哋鍾意睇咪睇，唔鍾意睇咪算囉，點解個個都判官上身去審判人哋呢？去抨擊人哋呢？」
• 「樓主用小程序，變相就當用香港電話叫外賣，剛剛用小程序試過，暫時係同用內地號碼用戶同價。」
• 「用得美團當然用大陸手機啦」
• 「其實美團都有其他優惠，只係比有內地身份證嘅人，有優惠去比當地嘅市民其實都正常」

美團已作出最新回應

事件引來大量網民討論後，網民近日再更新事件，指出美團願意為他作出補償，「更新，美團已經打咗俾我話現金補貼，我問咗佢一個問題係咪用香港電話綁定微信俾錢價錢係唔同，佢俾咗個肯定答案我係！」不過事主最後並沒有接受現金補貼。

事主反擊負評：只想大家知道價錢係貴一倍

有網民則認為事主是西客，而事主見此也反駁網民對他的指控，並表明自己只是想幫助到有需要的網民。「我見有啲人話我乞衣西客又成，話我影衰香港人，如果你覺得我發現唔同即刻取消張單係西客乞衣ok我接受，我係西客我係乞衣，不過我知道外賣員辛苦就算我無現金我都會俾小小貼士佢，咁可唔可以加返小小分？唔回應lu～希望可以幫到啲有需要嘅人」