港人指味千拉麵「有實力擊敗一蘭」但執淨4間好可惜 網民齊齊分析原因

連登仔力捧味千拉麵「有實力擊敗一蘭」

香港第一家味千拉麵在1996年開業，公司宗旨是「無論在哪裡，走進味千門店，都能吃到一碗日式正宗的大骨熬湯拉麵」。近日有連登網民出post，以「味千拉麵咁好食，點解會差唔多執曬？」為題，指「味千拉麵無論麵底同湯底都係頂級，識食拉麵嘅人應該都唔會反對」，又指「日本人都非常鐘意食」，更揚言「佢絕對有實力擊敗一蘭」，質疑這家高峰期有超過50間分店的「拉麵界嘅龍頭」，近年「會搞到得返3間左右？」

兩派意見：其實唔差 vs樓主食開屎？

貼文一出，即引起不少討論，有網民認同樓主所講，覺得味千拉麵其實不錯，最重要是價錢比較便宜，更是一種回憶：「我以前好鍾意食豬肉生薑燒」、「印象中有個相撲拉麵幾多料」、「以前覺得佢叉燒幾好食」、「細個食豬骨湯狂落蒜粉好正」、「細個成日去西九龍嗰間味千拉麵，童年回憶來」，有網民指「其實佢個豬軟骨做得唔錯」，甚至有網民留言「好味過一蘭」。

不過也有不少網民認為連味千也追捧，樓主味覺一定是問題：「你食屎大？味覺有問題？」、「第一次食，鹹X到仆街，之後冇食過」、「cls 味千都有人吹奏」、「出前一丁都好食過佢」、「個湯同個麵都好難食」、「味千上神枱，唔係掛」、「依家咁多好食嘅拉麵店，邊輪到味千啲味精湯呀」、更有網民笑言「餓我3、5、7年再畀碗味千我，應該都講唔出(咁好食)依三隻字」。

網民分析N大原因：沖粉味精湯

也有網民認真分析原因，指出應該是湯底及經營者不善的問題，有網民翻查新聞，得知「味千拉麵號稱以豬骨熬製麵湯，可惜後被發現湯底原是由湯粉、湯料調製出來，致生意大跌」，有網民質疑不少所謂日本拉麵其實也是這樣做，即有人回覆「佢唔係味精咁簡單呀，佢直頭係化學湯」；也有網民指出集團被中國企業收購後，「真係要講句因管理不善」，也有人指出「前食過啲舖面都幾污糟下。所以我覺得呢啲快餐店執笠最大主因都係衛生問題」。大家對味千拉麵又有什麼回憶和評價？

資料來源：連登討論區