食客嫌中環水記牛腩勁黐牙 網民嘲「唔識食」：呢間XX最正連白種元都大讚

食客慕名幫襯水記、嫌牛腩勁黐牙

水記是香港少數專賣新鮮牛雜牛腩的老字號，每到中午時份都大排長龍，連被譽為「韓國廚神」的知名主廚白種元在今年造訪香港都曾經慕名而來，對這裡的食物讚口不絕。而今次中伏的網民，也是慕名而來，他在Facebook群組「香港牛雜腩丸肉粥粉麪飯關注組」指，自己當日約12時來到開始排隊，但未等到有座位就已經聽到店舖指「爽腩沙瓜等已沽清，剩低只有牛雜普通腩」。樓主等了約半小時終能入座，即問侍應「有冇肥腩？」侍應表示只有瘦腩，樓主照點，之後送上「一碗很瘦的腩」，樓主更指天氣大熱但湯及粉不夠熱，更嫌棄指「食咗幾件已經用咗兩支牙籤，黐牙指數頂點，吃咗一半食不下去走人」，對水記非常失望。

網民嘲「唔識食」：水記食牛腩，你真搞笑

看完樓主的分享後，不少網民都有留言分享自己的經驗，有網民認同樓主，認為水記被過分追捧，其實一點也不好吃：「呢檔嘢真係試過就算，中伏中一次就夠」、「湯唔熱係死症，牛腩再好吃也不會幫襯」、「被神化了的大排檔，有得揀一定唔食」、「食過又係瘦腩，硬到爆，越做越差」，直言是「名大於實」。

不過也有網民指問題出於樓主身上，指水記最招牌的就是新鮮牛雜，直言「水記食牛腩，你真搞笑」、「想食腩唔應該去水記」、「人哋叫你去食牛雜，你就偏要食牛腩，牙力唔夠一味死咬就乜都唔會好食」，樓主也有回應指其實當日「食完牛雜粉，再另食碗牛腩」，不過也強調「牛雜亦沒有咁特別，湯同樣不熱」；有網民則指「新鮮雜係賣點～基本上係正常味道、冇咩驚為天人」、「今時今日，有得食新鮮雜已經好難」、「水記其實係食個情懷，呢啲排檔執一間少一間」。大家又覺得水記質素如何？

資料來源：Facebook群組「香港牛雜腩丸肉粥粉麪飯關注組」