Timberland黃靴被指風光不再　港男斥刮腳痛到不行粉絲反駁：你唔識著！

Sep 11 2023

對於不少80後、90後而言，Timberland和Dr Martens的經典鞋款可謂日常生活上的「基本嘢」，幾乎人人都擁有一對，這樣才可跟得上當時潮流。惟近日有港男以「好後悔買Timberland黃boot」為題，大呻「一啲都唔好著」，隨即惹來熱議。

港男斥Timberland著到刮腳又出汗：好後悔買咗！

有港男在LIHKG討論區發文，指當初為了買一對防水鞋，因而選擇了Timberland相當出名的黃boot，指「咁岩見到佢有特價（$1,000）就入手，買咗成年都係著得10次，著又辛苦除又辛苦，次次著完一係損曬一係甩皮，痛到仆X」，更指著出街夏天很容易出汗，本身打算「著到殘」就可避免新鞋刮腳的問題，惟自己已捱不下去。有網民看到事主的分享後，都表示自己買的那一對Timberland同樣有問題發生，指「買咗幾年著咗3次，一著又甩皮甩膠，對鞋又重，唔知佢好著啲咩」、「買完都好後悔，之前買諗住好型，但而家睇好肉酸，同而家流行嘅衣著襯唔到，香港男人九成著到MK咁，你有彭于晏咁嘅身形，加件純白底衫著Timberland咪佬味，但好多本身唔識襯佬味出來，上身無啦啦著潮tee或公仔tee就扣分」。

亦有網民指「真係得啲80、90後先會仲買Timberland，識著一定係著P記（Palladium）同HOKA」，更指黃Boot為史上最差防水鞋，行商場會跣腳，經常發出「Jip Jip」聲好麻煩，不解為何當初會被捧到上天。

網民反駁：著足340日都無事

不過亦有網民反駁，指「我基本340日都係Timberland對黃Boot(中筒)，初初著損同甩皮，但之後乜事都冇」、「唔知係咪以前著開red wing操到對腳腳皮極厚，又習慣晒著boot，一轉Timberland覺得對鞋勁好著，一至五都著佢完全冇問題好舒服」。亦有網民指自己著足7年都沒有事發生，更指甩皮甩膠的情況「就係因為你冇著，日日著，著緊第七年都冇事，無論咩鞋你耐唔著佢，都會甩膠甩皮，皮同膠最好既保養方法就係著軟佢，所以D人先成日話要定時著吓」。