ComplexCon散場奇景｜疑內地客巴士坐地飲可樂 司機霸氣「普通話」開咪勸阻

將車廂當屋企 霸佔輪椅位兼倒瀉可樂

Threads上一名同車乘客發文指，事發於3月22日深夜11時許，正值ComplexCon散場高峰。從網上流傳的相片可見，一輛龍運巴士的下層仿如「淪陷」：3名女生背靠行李架直接坐在地下，另外4人則霸佔輪椅停放區；更有1名男生極度誇張，直接坐在通往上層的樓梯口，完全堵塞車廂要道。最惹人側目的是，其中一名女生竟無視車廂禁食規定，手持打開了的可樂大啖飲用，樓主更目擊她不慎「倒瀉，漏到周圍都係」，令原本狹窄的車廂變得一片混亂。樓主無奈表示，雖然明白大家行完展覽好攰，但這群人疑似「打尖」上車兼「坐地下」的自私行為，實在令人難以接受。

車長頂唔順開咪警告 涉事男女死死氣起身

面對車廂內「群魔亂舞」的場面，負責駕駛的車長最終也看不過去。樓主指車長當機立斷，直接用普通話開咪廣播：「後面的人請勿坐地板！」這班年輕人聽到突如其來的廣播後，才如夢初醒般「你眼望我眼，死死地氣起返身」，極不情願地站立。事實上，根據巴士乘車守則，乘客嚴禁阻塞樓梯及閘門通道，亦絕對不允許在車廂內飲食。這群年輕人為求一時舒服，已嚴重違反多項規例，完全無視公共交通工具的基本禮儀。

網民怒轟行為自私肉酸 齊聲力撐車長

事件在網上極速發酵，大批網民看畢相片後都直呼「大開眼界」，狠批這班年輕人行為極度自私兼危險，直斥他們外表新潮但行為落後。有網民留言嘲諷：「一煞車佢哋就好似蕃薯咁左碌右碌」、「著到身光頸靚，點解地下咁污糟都肯坐？」、「咁後生就攰到企唔到？當正自己屋企」。亦有網民擔心衛生問題：「佢坐完地又坐返啲凳，其實整污糟晒」。同時，大批網民激讚車長的處理手法俐落，認為絕對不能縱容這些劣質乘車文化，紛紛提議樓主「寫信表揚車長，做得非常好！」