麥當勞餐枱擺滿垃圾無人清理　港人斥連20年前都不如　網民：情有可願

Dec 21 2023

現今科技發達，不少餐廳為了解決難請人的問題，都會以科技代替人手，不過有些工作是科技也不能取代的，就如樓面執枱。近日，有人在Facebook群組「麥當勞關注組（香港）」發了兩張相片，指「堂食麥當勞好似係垃圾站咁，管理大不如前」，引來網民共鳴，並就「原因」展開熱烈討論。

港人斥堂食麥當勞猶如置身垃圾站：以前啲經理好注重Lobby清潔！

該名港人拍下2張照片，從中可見幾乎每張枱上都有一盤盤進食完畢的餐盤，無人清潔。事主形容「堂食好似喺垃圾站咁，而家啲管理層真係曳，廿年前做麥記，啲經理都好注Lobby清潔」。

網民：20年前無可能會咁

不少網民表示自己經常發現同一問題，且不止發生於一間分店，「20年前我都係做麥記，咁樣嘅lobby真係會畀人X死，而家時代唔同了」、「以前冇可能咁情況，以前好注重QSC」、「而家唔會注重呢啲，當年連摺毛巾都有講點解咁摺同點用，而家見到唔會摺毛巾」、「以前經理見到咁，一定鬧死你班友，而家10幾個人逼喺收銀入邊，無一個肯出嚟執枱」。

麥當勞垃圾示意圖，非當事人） — （示意圖，非當事人）（圖片來源：ViuTV《季前賽》）

另外，亦有網民反怪香港人不自律，指「係香港人素質問題，如果人人食完都會自己拎去垃圾桶就唔會有呢個景象」，但即時被反駁，指「試過自己掉，畀阿姐話我掉得唔好」、「我都試過執，因為我要開餐，執執人哋個盤，一嘢倒晒落垃圾桶畀人鬧唔係咁做，害佢要執返出嚟」、「你幾時見大家樂大快活會有盤未執，咪將員工應份既工作推比香港人啦，我夠知人哋外國啲人會自動執，咁唔代表香港人唔執就係有問題囉」。