搭飛機遇鄰座除鞋傳臭味點算？網民各出奇謀獻重口味絕招

Jun 16 2026

搭飛機遇到無品乘客，真係會破壞晒成個旅程嘅心情！最近Threads上一篇求救帖文引起極大迴響，一名網民控訴搭飛機時，隔離位乘客竟然脫去雙鞋，將一雙赤腳踩上座位，更散發出難頂嘅酸臭味。帖文不但引發網民共鳴，更引來一連串超爆笑嘅反擊教學，短短1日就突破51萬次瀏覽！

飛機當自己屋企？女乘客除鞋晾腳傳酸臭

事主日前喺Threads發文，並附上相片無奈求救：「如果喺飛機度遇到個冇品嘅隔離位，兩隻腳都除晒鞋，好酸臭，又擺晒上凳度，好似喺屋企坐梳化咁，點處理？在線等」。從相片可見，旁邊一名長髮女乘客正低頭玩手機，雙腳完全赤裸並屈膝踩在座位邊緣，坐姿極度隨意，完全無視機艙禮儀及其他乘客的感受。

網民身同感受：好驚佢隨時隊埋嚟

帖文一出，瞬間引爆網民熱議，大批「苦主」表示自己都遇過類似情況，直言機艙屬於密閉空間，遇到這類欠缺公德心的乘客絕對是一場噩夢。有網民分享自身恐怖經歷：「上次飛東京又係，全程我都忍唔住係咁望住佢隻腳，好驚佢隨時隊埋嚟」，足見這種「無品行為」對鄰座乘客造成的心理陰影面積有多大。

網民齊獻計重口味絕招「傷敵0.1」？

為了拯救事主，網民紛紛發揮無限創意，提出各種極具娛樂性（但極難實行）的反擊方法。有人爆笑提議重口味絕招：「隊個鼻落去大力索，仲唔識驚就奶落去，保證佢收返埋」，隨即被其他人瘋狂吐槽這招根本是「傷敵0.1，自損一千」。亦有網民分享大聲公實戰經驗，教路與同行朋友夾計大聲喧嘩：「我勁大聲講：咩話？隔離隻腳好臭，我聽唔到！」，試圖以群眾壓力逼使對方穿回鞋子。

意外引發「除鞋等於臭？」邏輯大辯論

除了搞笑留言，這篇帖文更意外地在留言區掀起了一場「哲學大辯論」。有一名網民認真回覆，指大家認為「除鞋就係臭」只是一種「非理性邏輯嘅慣性思維」，更舉例反問為何中環OL穿露趾鞋、泰國遊客穿拖鞋就不會被覺得臭。不過，這番言論隨即惹來其他網民反駁，甚至將話題牽扯到不同國籍人士的體味問題上，引發了是否有「歧視成份」的激烈爭論。