Donki同yuu主題曲將消失？　政府修例禁用大聲公叫賣　網民：無得洗腦啦

環保署擬禁餐廳櫥窗播飲食節目介紹　稱等同叫賣

近日除了政府擬修例禁用大聲公叫賣，今環保署再強調餐廳若在門口播放飲食節目宣傳片同樣受管，事關相關錄製片段牽涉到餐廳內的產品，屬叫賣的行為。有議員問及何謂「公眾地方」的定義時，環保署回答指「如果有關場所入場要收費，就唔屬於公眾地方」。換言之，工展會並不在條例中管限，原因為「工展會要買門票入場 ，所以喺定義上並不是公眾地方，但設計場地時要避免參展商用揚聲器影響周邊公眾地方」。期後有議員再問花市入場不用收錢，那算不算公眾地方？「幾十個人圍埋一齊，一個人又點樣介紹？唔通逐個逐個介紹？」

網民：唔好再問啦，環保署就快Hang機啦

對於環保署的解釋，網民有更多的問題出現，惟有人指「唔好再問啦，環保署就快Hang機啦」，不過亦有人問「咁舖頭收費入場咪可以繼續用？」、「真係搵嘢嚟搞，到時你話告就告，唔告就唔告啦，都係為一萬蚊啫」。

政府修例禁用大聲公叫賣　網民：Donki同yuu首洗腦歌計唔計？

政府指由2017年起已收到不少居民投訴，指投訴數字逐年倍增，而荃灣、深水埗及元朗是最嚴重的黑點，屢勸商戶作出改善無果。環保署首席環境保護主任李志坤指已用盡在噪音管制條例中的賦予的權力，「除了檢控相關店舖違規事項，亦用條例檢控相關董事，同一間店舖同時不斷犯法，我們是可控告董事，我們連個董事亦已控告過。」而今次政府提出的修例，是主要集中在公眾地方用大聲公叫賣，針對錄音機式的噪音滋擾，甚至有機會連真人用大聲公叫賣都不行」。

網民：咁Donki同yuu首歌要滅絕？

消息一出，網民即在網上掀起熱議，不少人即時提出「Don Don Donki首歌同yuu呢D舖頭洗腦歌終於可以消失」，指平日行街聽到「Don Don Don Donki～Don Don Donki和yuu」這種洗腦式轟炸「聽到頭痛」，連鎖超市職員亦曾反映「超市無間斷式播歌好嘈吵，員工被洗腦8至10小時，覺得十分煩擾」。不過網民的如意算盤又未必打得響，事關環保署指今次為針對街邊店舖，由於Donki和這些連鎖超市並不屬於公眾地方（街邊）位置，大多屬商場或一間店舖，不屬今次修例範圍內，但受噪音條例監管。不過若果歌曲帶有宣傳和叫賣元素，則屬於灰色地帶，歡迎市民在諮詢期間提出意見。

市民聽到成頭問號　好奇：公園廣場大媽播歌又計唔計？

除了Donki及Yuu歌曲，不少人都指最討厭大媽廣場舞時大聲播放音樂，指「幾時禁埋大媽開喇叭」、「屯門公園大媽禁到未」、「禁大媽不停播歌/唱歌」、「D廢老喺公園朝朝7點幾開行個喇叭，做早操又點計？有時都唔係早操，開大個喇叭係到傾計，罰X埋佢地就啱」、「呢D例就管埋D人喺公眾地方大聲聽錄音同播歌啦」。但其實早於2020年，康文署新修訂的《遊樂場地（修訂）規例》已正式生效，加強規管在遊樂場地唱歌，規定任何人不得進行音樂活動令他人煩擾，亦禁止任何人索取或接受酬賞，至於成果就有待大家自行觀察一下。