業主放租遇單身女教師超倒霉 每月被叫上屋企3次：唔好再租畀「三師」
放租遇單身女教師變麻煩租客 業主：每個月都上去2、3次
有小業主於Facebook「香港租務糾紛討論谷」發文表示，持有的單位之前租予一對夫婦近兩、三年，一直相安無事，期間未曾上門進行任何大小維修；不過，租客因上車而退租，最近單位由一位單身全職女教師承租。業主於帖文大呻，「而家個租客好煩， 好多嘢唔滿意」，具體事件包括已按照女教師的意見，找水電師父維修和更換熱水爐、抽油煙機、抽氣扇等。
一有問題即WhatsApp奪命追魂Call
不過，女教師每個月仍提出一連串問題，當然大部份都是雞毛蒜皮的小事，例如單位燈掣開關不暢順，然後更換了新面版 ，女教師又投訴電視接收有問題，最後得知是她拉斷了天線。其餘還包括鋅盤去水慢、衣櫃門鉸鬆脫、焗爐跳掣等，可是女教師「唔肯開個電箱， 話驚有電」，令業主忙於提供協助。 業主又呻：「佢（女教師）一有問題就會whatapps追， 一定要即刻去幫佢整。唔得閒或遲啲去，佢就話自己揾師父整，到時租金扣。」即使女教師準時交租，但業主每個月都要上去兩至三次「幫佢整嘢」，開始感到煩厭，更提出終極問題：「死租仲有大約半年，其實係咪一到生約就可以冇理由下即刻唔租畀佢？」
網民：放租單位小心「三師」
網民看到業主分享後都表示同情，更「教精」業主要提防「3個師」，「分別為教師、會計師、律師，佢哋自己搞臭自己個朵！」 、「其他兩個師我都理解，無諗過老師會係煩，諗住有學識有教養」、 「我諗我個租客同你有八成似！小題大做，一個月起碼，維修一至兩次」、 「因為一開始你有求必應啊！」、 「租霸唔搵好人落手咁搵邊個？」、 「我以前租俾護士，剛巧Sars，她扮因病被困，在醫院出不到來，拖租不交！」、 「有啲租客係會以為自己租緊Service Apartment，連盞燈燒咗粒燈膽，都夠膽叫業主上去換！」 、「女租客做會計，老公做旅行社，我仲以為上環塊地皮係個租客，大支野到呢！」 、「租約係隱含用者自付原則，日常正常損耗除外」 、「直頭做埋佢阿四」。
