東張西望｜80歲老伯沉迷34歲按摩女郎　賣樓套現2百萬被呃走　網民：有隱瞞

80歲老伯樓梯轉角遇上34歲按摩女郎　親如家人豈料被呃走200萬

80歲的姜伯一開首便指控被34歲的按摩女郎小玉呃走200萬，指「呢個女人見錢開眼」。事緣80歲的姜伯一直以來都有2名兒子給家用，加上政府的老人津貼等，每個月本來有$15,000元，理應退休生活無憂，但由於他沉迷按摩，被2名兒子發現後旋即停止發放家用。「我主要使喺按摩度，佢可能唔知我咁鍾意搵女人按摩，嬲到走咗去，淨低我，唔畀錢我啦個仔」。無錢使，姜伯上年唯有賣走黃大仙的物業，換來208萬的生活費，但就因這208萬而發生今次事件。

姜伯指，小玉是按摩女郎，日常都會像其他女人一樣站於樓梯旁等客，自己2年前經過時被小玉「召喚」過去。「佢叫我行過去㗎⋯⋯無親密行為⋯⋯按摩咗一兩次囉，之後都無咩」，姜伯指小玉人前人後都叫他做姑丈，有家人的感覺，其後小玉更叫姜伯把賣樓得來的200萬放在她家的保險箱，代為管理。「佢叫我分批喺銀行拎200萬出嚟，放佢屋企保險箱，等我唔使亂花，啲錢可以細水長流。佢話每個月生活費比$6,000你，你住嗰度$7,000租，幫你畀埋」，以為有人幫自己看管財產，由上年8月開始小玉確實每個月畀$6,000生活費，但到今年10月就沒有再付費，「我同佢講，點解唔畀錢我，我一蚊都無，食粥水都唔夠」。不過節目組查問訊息記錄時，姜伯卻指已全數刪除。

《東張》搵小玉了解　竟出現另一版本：佢屈得我好緊要！

除了姜伯一方的言論，節目組亦找來女主角小玉查問，豈料小玉相當激動，指「我真係當佢好似呀爺，無諗過咁樣反咬我話我呃錢，屈我話有200萬擺我度」。小玉指自己遇到姜伯時，覺得對方很可憐，獨自一人，無家人陪伴，自己把姜伯視為親人般照顧，但接觸多了後，她發現原來姜伯的子女與他早已斷絕關係。主持人追問如何得知，小玉就開始大爆料！

她指「我睇佢電話見到，張相係佢自己坐喺屋企，有張紙係寫上兩個仔話以後唔會理佢」，除此之外，她又發現姜伯電話有不同的女人聯絡，最少有3-5個。而節目組經姜伯同意下看他訊息內容，見到確實有大量不同女人的照片，對話內容更包括「$500全包啊？」、「你留著我遲些過來拎順便錫你」等等。小玉更指自己搬屋時，姜伯送她2樣貴重物品，一樣是他不用的保險箱、另一樣竟是「一張佢老婆嘅相同佢老婆頭髮，仲有個墳場電話」，意思叫小玉代其處理家事。而小玉更澄清自己有跟姜伯到銀行提款，但並無放200萬在她家中。

「我同佢第一次去銀行拎20萬，佢還7萬畀我，話要還畀人錢5萬，一個3萬，仲有佢自己生活費。我記得每次拎10萬，有2次拎20萬，拎10萬時佢擺5萬喺我到，拎完用晒就去銀行拎」，意思指其實姜伯每次只放數萬元於小玉處，其餘的都是他自己花掉。姜伯更曾向小玉表示「你唔畀錢我我無錢食飯，我暈低報警就同佢哋講你呃我錢」。而節目中，小玉更與姜伯隔住電話對質，指「姑丈，你亂講嘢，係點你最好點講，你賣樓係自己賣，支票係中環入，我陪你拎，拎完用晒就屈我話擺200萬喺我到，話我等你每次拎完就拎去我屋企，畀你你會唔會咁做」、「銀行拎完你就拎5萬走，你拎咗D錢話唔記得，唔知係真定扮，你要咁講就隨你，你自己使去邊，拎去邊個女人到你知道，唔好屈我，你問吓自己個心」，期間更似是激動到流淚。

而姜伯在小玉激動反駁時，亦同時開口說話，指「我WhatsApp同你講但你無覆我，舊年放200萬你度，小玉你發緊夢，200萬點畀女人洗到咁多」；而小玉亦不斷連珠炮發，指「你自己用晒就話我用晒，所有嘢我都講過，你點用我點知，我估唔到個老人家會咁樣做，為咗出邊女人向仔女拎錢玩女人，去嫖，叫女人上門按摩，我無講假一句說話，就嚟100歲，點可以做到咁盡」。而姜伯砸強調從來無屈小玉，指每次10萬、20萬、30萬擺小玉屋企擺保險箱。自己報過警但不受理，因警方指是姜伯自願給別人。姜伯最後更透過鏡頭向小玉稱「我生活養老金，我希望你畀返錢我」。

網民：我就撐按摩玉啦！

網民看罷，完全一面倒不幫姜伯，反指他「抵死」。留言大部分認為「唔抵可憐，贏嗰陣你就爽，輸哂個陣又扮無辜」、「10分鐘開始，寒戰式對罵，好有郭富城梁家輝feel」、「80歲按咩摩，骨都散，唔係色心起點會入局，老人家唔清醒，但自己認為自己係最醒唔會被人呃。本身好好有兩個仔畀錢都唔心足，同廿幾三十問價，500一次真係按摩咩，了解自己80歲好多時候唔清醒，人哋講咩你就信咩，加上色心起放錢人哋屋企，要錢問人拎就唔清醒啦，要放錢係屋企都係自己屋企啦」、「我就咁聽覺得小玉個方比較真誠D，當然抽小小油水也在所難免」、「按雀仔唔使錢咩！阿伯，八十歲仲有心有力！勁」、「做完雀仔按摩畀完錢，轉頭報東張話畀人呃錢」、「阿伯好清醒自己做過的行為，取現金交畀女人保管/送錢等名義阿伯很清楚，事後追究咩？又話報香港警又話報大陸警，真係多嚿魚 ，色字頭上一把刀就當畀人劏咗筆錢，送錢畀人洗」、「呢之我真心信個大陸女人！我覺得個女人真係沒拎佢咁多錢，最多從中撈些少油水！ 而個啊伯唔知係炸懵定真懵！但就肯定佢係有隱瞞！根本自己已經用晒+比晒其他G啦！呢個啊伯真係極度唔可信囉！」、「為咗按雀連樓都賣埋，仔又走埋，呢個阿伯好得去邊」、「撐按摩玉啦今次」。