東張西望｜海洋光譜號抵港　郵輪碼頭的士司機成肚氣：以後唔會再嚟

今再有大型郵輪到港　的士司機等足1個鐘都無客！

今日大型郵輪海洋光譜號接載住4,500旅客到港，不少旅客一落船接受TVB《東張西望》訪問，指交通安排比上次好得多，相當滿意。旅客好評大增，惟現場另一邊廂卻有人叫苦連天！當初政府大派$50現金券吸引的士司機入郵輪碼頭接客，眼見今日遊客眾多，有的士司機專程揸到現場等客，惟一等就等足1小時，更指「你畀$100，$200都無用，入嚟等1個鐘，接單$27」、「政府話好多客，入到嚟完全唔係個回事，我同總台講叫的士千祈唔好嚟，好悽慘」、「長遠唔會再嚟，你有免費巴，的士點做」。

不過文化體育及旅遊局局長楊潤雄指已派$50現金券希望作出成本上的支援，但不能確保所有的士都馬上上客，呢個係事實，大家要接受」。

市集人流更驚人：搭𨋢都唔知要按邊層

至於另一個重頭戲「手信市集」，早前政府指有望因市集而帶來人流，刺激消費，惟節目組指眼見現場相當冷清，主持由地面行足10幾分鐘先到市集位置期間有郵輪工作人員都要人帶路先識行到市集，連「搭𨋢都唔知要按邊層」。而有市集員工指「朝上9點有船到，到晏晝都唔係好見有人入嚟，無咩人知有市集搞」。

港人：係人都唔去啦！

其實早在市集開始前，有不少網民指「點會有人去呀，個位又僻，遊客落船都即走啦，仲話要行去咁遠行市集」、「有人行足45分鐘都搵唔到個位喺邊，指示得個一張紙喺地下，之後點行無人知」、「市集喺啟德郵輪碼頭A區2樓，落船喺B區，遠到咁，有無人會行過去？係人都唔去啦！」