東張西望｜癡心老伯尋40年前一見鍾情女神 以淚洗面哭訴故事：佢實記得我
7旬伯伯上《東張》求愛人 邂逅故事精彩絕倫
施伯伯指自己於1982年5月7日，乘搭一架由旺角去荃灣的33M巴士上見到這位令他念念不忘的絕色美人，指「佢喺新填地街上車，一上車我見到佢就覺得佢好靚好靚，太唔簡單，太觸動人心，我哋有一吓眼神交流，我即刻觸電，真係不得了」。而當時他心不停砰砰跳，猶豫了一會兒後終「的起心肝」與對方講話，「我擰轉頭同個女仔講，你靚到可以參加香港小姐」，誰知對方竟只回了他一句「關你咩事」。雖然被鬧，但施伯伯卻滿心歡喜，認為成程車40分鐘，大家都不停互望，對方望他時，手腳都通紅，「佢一定唔係怕醜，我對佢一見鍾情，打動到佢，佢都一定好鍾意我」。
施伯形容女神容貌：我以為係李嘉欣
施伯伯指自己當時雖然已經成家立室，有一妻一兒，但成世人只有這次有強烈反應。當主持問他對方容貌時，他即興奮地形容指「面型好似你，鼻高高，女仔嚟講佢算高，有160cm」，更形容外表如李嘉欣，當自己1988年在報紙見到港姐照片時，一度以為李嘉欣就是該名「巴士情人」。施伯伯又指自己當時在巴士上其實都想追求對方，但又心生害怕，「我唔追佢，佢先係中學生，我大佢15歲，我當時心跳好強，但落車後傾慕之情一發不可收拾，我每次諗佢都會諗到流眼淚，好後悔點解當時我落車，我早知就比我名同地址佢，睇佢會唔會寫信比我」。
寫書、登報尋人無果 最後寫信求女生校長幫忙
而他指自己對對方並非「愛」咁簡單，自己一早成家立室，但太太和兒子來港後一起生活了幾年便分開，「個女仔係我精神支柱，我唔係癡情，係愛得好深，我係報恩，佢真係好靚好靚，咁多年都想搵佢」。而最厲害的是，他自己寫書尋人、登報尋人，通通都全數無功而還；但他並無放棄，反而更積極地學習上網，為求得知當時女神身穿的校服所屬那間學校，最後被他找出校章有3個紅色英文字的校服應是聖安當女書院，於是試過寫信比當時校長求幫忙，又試過在校門派傳單，但都無果，最後就選擇到最多人流的地方，用大字報求愛，並唱情歌「只想再看一次令我暖暖的眼光⋯⋯」。
施伯3度落淚：感謝你令我人生咁唔同
人未尋到，但施伯對女神的思思念念無法控制，搭巴士會哭、在家想到對方又會哭，對住鏡頭剖白又再次激動流淚，指「佢唔會唔記得我，只要搵到佢就死而無憾，感謝你帶比我咁多回憶，感謝你令我人生咁唔同，想知道你幸唔幸福，你幸福我就放心」。
港女：好浪漫好Sweet 港男：你放過人啦
癡心情長伯的故事，令一眾女生聽完都大表支持，稱「難得咁長情，好浪漫，好Sweet」、「皇天不負有心人，伯伯如果搵到就真係最好嘅事」、「而家D男仔唔會咁長情，好難得」；女生聽後超感動，但男生聽到就超無奈，有男生指「放過人啦，都40幾年前」、「有無諗過對方望你係因為覺得你好怪，全程車望住人，驚有危險呢」、「笑死，40幾年前咩樣都變晒啦，仲點搵」、「全個愛情故事都係佢幻想，仲話人一見到佢就全身紅晒，好有黃味囉，好得人驚」。
