女客人用透明袋偷零食被按摩店放相上網　網民鬧店方小家令老闆急作澄清

泰式按摩店被女客人用透明袋擅取店內零食走　負責人貼背影相上網捱轟

近日有一張女客人在按摩店離開的照片在網上瘋傳，事關相中人原來在一間有提供零食任食的按摩店按摩後，用一大個透明袋公然拿走大量零食。負責人發現後隨即把女客人的背影照放到公司社交平台專頁上，並指「李小姐，你可唔可以尊重一下我哋，唔好拎透明袋好嘛？如果你真係鍾意食，同我嘅同事講聲，我一定會比你拎返屋企呀！點都好，我都要多謝你，多謝晒」。

言論被網民火速洗版：其實你應該當面制止而非背後小動作！

有不少網民看到後，都表示「嘩！D人狼到咁，唔係拎一兩樣，係成袋喎」、；不過有更多人反鬧店方，指「客係唔啱，不過呢間嘢都唔好幫襯，講完」、「店主真係做得好醜怪」、「作為一間店，你應該當面制止，而唔係應該影佢背影上網公審，咁樣係恰人有咩分別，就算我唔係顧客，我睇完都一定唔會幫襯你，你當面制止咁佢都唔會夠膽拎，你而家咩形象都無晒」、「為咗幾粒糖，無咗個會洗幾百蚊嘅客，真係好有諗頭」、「嘩，邊個員工咁做，老闆應該炒佢啦」、「你都無必要公開人哋個姓呀嘛？」、「背後做小動作點解你唔即止阻止，為Make Noise？」。

店主開LIVE澄清委屈真相：我手掌係肉，手背又係肉

眼見負評不斷，店主蕭生特意開LIVE解釋事件。開場時他已講明「呢張相係我放上網，一人做事一人當，鬧我無問題，唔關我同事事」。他解釋自己一向向客人保證「泰然」是會有Pantry提供小食給客人在場內任食，但一早講明「不准外帶」，只限堂食。他指自己並非因為「幾粒糖」而出Post指責李小姐，自己亦不介意客人「食住走」，但令他最不滿的是李小姐竟施施然用透明袋拎走零食，蕭生認為「好唔尊重我哋」，若然對方不覺意或認為太好食而取走，店方一點也不介意，但你只要向店員講聲便可，但用一個透明袋取走一堆零食，「你咁樣叫唔覺意咩？」。

店主非自願Post相：係客人影呢張相畀我

蕭先生又指自己「根本唔想擺張相上網」，但照片是客人傳給他的，並向他問道：「點解大家都係消費$300，我唔可以拎走，點解佢又拎得走，你講過好多次發生呢種情況係會譴責，會公開㗎喎」。基於「做又死唔做又死，我做你又話我，唔做又比客話，手掌係肉，手背又係肉」，因而逼於無奈下只公開對方的背面。加上李小姐拿透明袋確是非常不尊重店方，蕭先生認為對方擺明「我攞又如何」。

店主：我有心理準備，我唔驚！

蕭先生又指「有人問我點解公開佢但又唔公開佢資料」，強調現時只是公開李小姐背面，可算是交到功課又唔得罪任何人。他指有人講明不再光顧，更責罵店方，但「我有心理準備，我唔驚，香港係公平公正地方，我哋凡事都要合情合理」。他提到有人問他為何不報警，但自己認為「我點會小氣粒糖，係有客話我知，叫我做嘢先做，唔通同個客講李小姐可拎走，你唔可以拎走」。而蕭先生再澄清自己非公審李小姐，只想話向他表達「我覺得好唔尊重」。

網民：到底幾時D人將責任調轉晒

網民聽到解釋後，紛紛轉投為店方說話，指「原來佢拎咗咁多，仲以為係幾粒糖，咁又真係過份」、「其實店方一早講明，店內亦貼出不准外帶嘅通告，講到明晒都仲拎走，呢個錯係個客犯，點解D人咁鍾意將個責任拋去店方到，仲話人唔啱？」、「呢個社會真係傻咗，平時葵芳D舖頭畀人偷嘢貼個賊大頭相出嚟捉賊你哋又唔話錯，而家佢都係咁做，連樣都無出，都要畀你哋鬧？有病呀？」、「如果咁都鬧店主，咁不如直接cancel任食零食呢Part啦，香港人又真係唔值得擁有呢D自由」。

不過亦有人指「D客叫你做，你就做，咁佢叫你唔好收錢，你係咪全部Free先？」、「講到尾都係唔會幫襯你，隨便就將人張相放網，你都唔識尊重人，叫人尊重你？」、「如果個客喺你到洗咗幾千蚊，幾萬蚊，佢咁做你會唔會放佢相上嚟？講到尾咪又係錢」、「咪喺度扮有心博同情啦，分明就係唔想自己畀人鬧，就卸責落客到」。