手抱BB搭巴士無人讓座嬲到震　毒舌詛咒無辜乘客　網民霸氣出面K.O.

Sep 26 2023

關愛座的爭議不斷，一直以來都有人揚言支持取消「批鬥座」，以免再發生交通工具上的爭執事件。惟意見提出了多年都未受關注，反而越來越多人因不被讓座而在網上發爛渣的事件發生。而早前有匿名人士於Facebook群組「屯門公路塞車關注組」貼出一張巴士圖，斥對方不主動讓座好自私，結果被網民霸氣圍攻鬧到刪文，再度掀起關愛座應該取消的話題。

手抱BB搭巴士無人讓座　影乘客正面相公開批鬥

匿名人士在Facebook群組「屯門公路塞車關注組」中，貼出一張巴士關愛座坐有2名乘客的照片，從照片中可見一名婦人及另一名恤衫男分別都在低頭玩電話，而樓主留言指「見到手抱嬰兒都唔肯讓座嘅自私L」，更Hashtag「#可能人哋喺跛嘅呢」，毒舌詛咒坐於關愛座上的兩名乘客。

網民：搭巴士仲手抱咁危險？

網民看到帖文後，紛紛留負評，並指「搭巴士仲手抱BB？你係無常識定無腦，一剎車就算坐都有危險啦，用孭帶囉正常都」、「張相邊度有BB？你話係就係啦？見唔到無真相，淨係知D On_人又講批鬥座」、「做咗人阿媽為咗個位，把口咁惡毒，真係恐怖又可悲」、「應該問bb個爸爸，做乜咁自私為慳錢，X出搞個b出嚟」、「點解你咁自私生B唔買架車自己揸，要BB逼巴士」、「攪大佢個肚個人點解唔call的士比佢搭，陰公抱住BB仲有手影相」。

手抱bb 巴士示意圖，非當事人） — （示意圖，非當事人）（圖片來源：《第八日的蟬》劇照）

被圍攻即刪文　網民：以後點都唔會讓座

亦有網民指關愛座造成極大困擾，指「應該係影相個位本身係巨嬰」、「自己有把口想坐咪同人講囉！話人哋跛，唔通佢自己都係啞嘅！」、「其實而家個個掛住睇電話，少關注身邊環境，關愛座係讓座比有需要嘅人，如果你有需要，可以出聲」、「其實唔讓都唔係問題，人哋可能都有需要。讓係人情，唔讓係道理」、「Sor，見到呢個post之後我決定讓畀老人家都唔讓畀手抱B」、「學周潤發(發哥)話齋，佢去搭地鐵都冇人留意到佢，因為個個都做晒低頭族……其實真心望唔到都唔出奇，做人千祈唔好咁玻璃心」。