孫慧雪貼囝囝功課照望大家評理　中文字跟到足都話錯：教到小朋友矯枉過正

孫慧雪貼囝囝功課照望大家評評理　「在」同「。」到底錯啲咩？

孫慧雪於帖文中稱「現今教學對小朋友嘅寫字要求認真嚴謹，個『在』字錯，連『。』都錯」，再補充稱「呢個係佢（囝囝）補習嘅卷，而佢讀緊嘅學校可能行IB，係要求佢唔好咁執著啲筆劃，唔啱唔洗擦直接用筆搽咗佢，再寫隔離，等小朋友更有興趣寫字同學習，亦會唔怕錯更勇敢表達！而佢喺補習班，知道要求好高，所以先會重複個筆畫，背後動機其實係想寫好啲，我自己認為，呢個時候仲圈佢，會減少小朋友學習動機，亦會教到個小朋友都矯枉過正，所以佢成日都會用紅筆，圈我啲字，細個啲嗰陣，見街上面啲招牌，用咗唔同書法嘅時候，佢會問人地係咪寫錯（只屬個人意見！）不過可能補習班想佢返學做好啲啦」！

網民見相即表示有同感：我覺得好黐線，乜嘢都話小朋友錯

網民看到分享後，即留言指「係呀，好多字例如『告』，如果小朋友跟著寫都係當錯。最穩陣就係跟小學學習字詞表App，就唔會扣分」、「其實而家係變咗寫電腦字。好似個『雨』字，本來就係『四點』，跟電腦字型第四點變咗做『捺』」、「所以我覺得好黐線，乜嘢都話小朋友錯，嗰陣整出世紙搞咗好耐究竟係點樣寫，係悅定係悦」、「為扣而扣」、「個句號係咪嫌唔夠圈，不如要求用圓規畫啦句號」。

網民：錯在翻筆　孫慧雪：本人大學已經係修中文

有網民指出「在」字確實係錯，「『在』字，句號，老師應該圈佢『翻筆』，唔係話佢筆畫錯。留意下，老師圈佢翻筆果個位」、「要感恩遇上這個 功課上都執筆劃的老師，遇上一些只會在默書/測驗/考試先嚟執筆劃仲扣埋分嘅老師仲慘」、「在字錯在駁咗筆，阿女今年K2， 前2星期嘅功課老師提醒我，唔好駁筆」。孫慧雪即留言回應指「我意思係以前我哋寫字翻筆唔會扣分，但現今世代嘅小朋友翻筆都會被扣分」、「細個學嘅在字，嗰一棟係穿頭嘅，而家係唔穿頭嘅，仲有好多字，同我以前學嘅已經唔同啦！（利申：本人大學已經係修中文）」。

傳「姓葛」的人特別容易寫錯「口」字邊

有網民表示看到分享後被勾起童年回憶，指「我以前寫字啲口字邊全部用圓圈（告字個口、話字個口），結果老師罰我做壁報板，所有字用「姓葛」的思維寫法，唔准用『口』手寫，寫到我怕又公開話我」，而葛民輝同樣寫「口」字邊都會用圓圈代替，因而有人指「姓葛嘅都係會咁寫，係咪佢哋特質」。