餐廳外賣餐具逐件收錢貴到喊！網民大鬧好黑心：北上食飯都無咁離譜！

餐廳外賣餐具收費表曝光惹熱議　網民：未食個飯已先收多你$8

Facebook群組「香港突發事故報料區及討論區」上，有網民稱「正啊，繼續開心香港2420」為題，附上一張「外賣餐具，餐盒收費表」，惹來港人熱議！收費表上列明「飯盒、碗類每個收$2；餐具每份$1；紙袋每個$1；紙飲管每支$1；凍熱紙杯每個$1」，並且由2024年1月1日實行。

事件引來網民熱議，大家都主要一面倒鬧爆，留言指「即係點？分件計咁癲？一份外賣咪可能收多6-7蚊？」、「大家都唔係好想攞啲盒返屋企！ 帶環保餐盒畀你哋裝又西口西臉」、「我想外賣但我唔要你嘅飯盒、餐具、唔要紙袋要膠袋，咁得唔得？但你要搵嘢入畀我喎」、「我自己帶備飯盒、水杯、湯碗，畀你哋裝，唔使收啦！係咪呀？到時話有另外收費呀！」、「全部即棄嘢都唔拎，每樣同我減翻相應價錢囉」、「叫個外賣最平都加6蚊」、「繼續全力支持環保，北上食飯」、「真心北上食飯都無咁離譜」、「只要操普通話人士X到上小紅書 就會變翻免費」、「好快轉用蕉葉載食物」、「不如筷子右三元、左二元」。

網民幫口：餐廳都有苦衷

不過，亦有網民幫忙出聲，指餐廳都有苦衷！事關由2024年4月22日起，全港首階段進行即棄膠餐具管制，當中提到禁止食肆提供即棄塑膠餐具，包括：

1. 發泡膠餐具（堂食+外賣）
2. 塑膠飲管（堂食+外賣）
3. 塑膠攪拌棒（堂食+外賣）
4. 膠刀叉匙（堂食+外賣）
5. 膠碟（堂食+外賣）
6. 膠杯及蓋（堂食）
7. 食物容器及蓋（堂食）

有同樣做外賣行業的網民留言指「同膠袋一樣唔可以免費供應，仲要係外賣盒唔可以用pvc一定要轉用環保物料，環保物料嘅餐具被pvc 貴差不多$1，用pvc盒0.7環保物料要$1.6一個。我做屋邨外賣店，真係頭都大埋」、「佢哋唔收你錢就比人罰錢，佢只係清楚列明俾你哋聽免誤會， 不過真係貴咗，一個外賣正常只需收二蚊 （一個餐具），佢分開計就真係黑咗啲」。