啟德AIRSIDE被斥完全無定位　大商場淪為POP-UP集中地：真係悶到癲！

Nov 13 2023

啟德大型新商場AIRSIDE開幕至今差不多兩個月，不少人都對商場抱有期望，貪其有「啟德版K11之名」，加上是寵物友善商場，開幕時大受附近街坊及狗主歡迎。不過時隔近乎2個月，網上已有人指AIRSIDE「搞到好似垃圾咁」，大數其缺點，指「真係去完都唔知行咗D咩」。言論更惹來熱議，不少人指「行後感」令人大失所望，商場只是「一堆Pop-Up Store放埋一齊」。

啟德新商場AIRSIDE被指完全無定位　店舖奇怪似趕客

有網民於LIHKG討論區以「點解airside咁垃圾」為題，指「行咗兩次，個場到底係以咩為生？咁大個場，想買件衫都買唔到，咩世界之約，X佢老X，Stock X嚟嘅，炒鞋都世界之約？得間Muji仲要細到老X都唔認得」。隨後旋即有網民加入討論，表示非常認同，認為AIRSIDE有4大缺點：

1.商場猶如只得美食廣場

不少網民指自己去完AIRSIDE後，只感覺全個商場「都係Cafe」，指「成個場得cafe，唔通想打做cafe商場？」、「成個商場都係食嘢，感覺上就係全港第一個全餐廳嘅商場」、「餐廳定價高，日本嘢閒閒哋嚿幾水一餐，又唔係好食」、「去完淨係知食咗個好貴嘅tea，完全勾唔起下次去嘅慾望」、「cafe間間逼爆，其他就無人行，其實真係悶到癲」。

2.店舖類型好奇怪

另外，更多網民指的是AIRSIDE的店舖類型奇奇怪怪，指「女人想睇衫睇鞋睇首飾，無；男人想睇波鞋睇電器，無；小朋友想睇玩具睇公仔，無。第一次行街行到咁空虛」、「成個商場賣鞋嘅得個2間，賣衫都唔見多間，又無U記又無GU呢D基本嘢，得間好細MUJI，唔知個商場想人買D咩」、「無端端有間跆拳道館，然後D小店又唔係賣玩具，衫褲鞋襪無一樣買到，裏面一律都係啲賣文青本土pop up嘢，但又唔係好特別，都唔知賣緊咩」、「間間格仔鋪買嘅嘢七成一樣，直頭成個低級市集咁」、「咁大個商場變到POP-UP集中地咁」。

3.商場指引不清晰

有網民則指商場的指引不清晰，並分享自身經驗，指「airside個設計好唔知點講，見到D啊叔啊嬸成日搵唔到路開道門，即係D非公眾位嗰D走廊，成個場睇落好大但好空，得食嘢同戲院嗰到多人D」、「上次搵廁所點知走咗入餐廳後門，走廊位有啲侍應衫嘅人喺到玩手機，以為佢係去廁所偷懶，點知行極到冇男女廁logo，已經係跟住天花嗰d指示牌兜咗半層」。

4.想扮K11但又無主題

AIRSIDE自開幕以來都被稱為啟德版K11，不過網民指「好明顯係想扮K11個Feel，但又無主題，入面乜都無，好奇怪」、「佢想文青又文搞唔晒，高檔又高檔唔到，貼地D生活D，賣D嘢又唔係生活所需」、「其實行musea 路線幾好，有大brand 有啲市集咁，啟德印象中其實無乜外國人，開city super 嘥氣」。