港鐵老婦命令式要求讓座｜年輕男爆Seed反擊「老奉呀」 臨走一舉動惹全網怒轟
老婦命令式喝令讓座 年輕男爆粗反擊「唔該都冇聲」
根據事主上傳的影片，事發時氣氛相當緊張。影片開首，一名手部綁上厚厚繃帶的老婦，對著一名年輕男乘客直接命令：「喂！你起身畀我坐呀。」男事主聞言即時情緒激動，爆粗反問：「老奉呀而家？」老婦理直氣壯地回應：「而家想點呀？叫你起身，你後生仔……」男事主隨即火力全開反駁：「係咪老奉先？唔該都冇一聲。你講嘅，我會起身。但唔係你一行埋嚟，我工人呀而家？你畀X咗錢我呀？」其女友亦加入戰團，指若老婦身體不適可以禮貌詢問，而非直接命令。面對兩人圍攻，老婦毫不退讓，更一度挑釁稱「你打我囉」，令男事主更為憤怒，怒斥對方態度惡劣：「你本來咩態度呀？你問下咁多個呀，一入嚟乜X野事呀！」期間雖有乘客上前勸阻，但亦有乘客看不過眼，發聲力撐事主「後生仔係冇錯」。
事主還原經過 強調「尊重係彼此嘅」
事後，男事主在網上發文詳述事件經過，他指事發在5月25日晚上約11時，當時與女友由羅湖站上車，並強調所坐的並非關愛座，「呢個啊婆衝入嚟指住我一個叫我起身俾佢坐，我嬲嘅位係佢衝入嚟命令我起身。」他坦言被對方的舉動嚇到，並非不願讓座，若對方好好溝通，他必定會讓座，但最令他氣憤的是對方的態度。他憶述，雙方由羅湖一直爭論到火炭，最後老婦疑因不敵言論而下車轉乘，但下車前竟不斷舉起手機拍攝事主容貌，企圖公審。對此，事主霸氣回應：「我冇所謂一直企喺度俾佢影，我又冇做錯怕乜。佢都咁樣嘅時候，我都唔使禮貌對待佢啦，尊重係彼此嘅。」對於有網民質疑為何最終仍讓座，他無奈解釋是怕被人反指不讓老人家而理虧，並強調自己並非針對所有長者。
網民一面倒力撐事主 狠批老婦「恃老賣老」
事件曝光後引發網民熱烈討論，輿論幾乎一面倒力撐男事主，狠批涉事老婦行徑野蠻，完全是「恃老賣老」。大批網民留言表示：「敬老係首先對方要有禮貌」、「你有需要我讓你坐係我人品好，但你呼呼喝喝唔識禮貌我咪教你囉，兩件事無衝突」、「要讓位可以，但首先要有基本禮貌先。另外唔好恃老賣老，我都好討厭呢啲人，老唔係大晒」。更有網民理性分析：「年紀大，隻手傷咗，唔舒服，唔企得，點解唔叫救護員？」不過，亦有少數網民認為雙方都有問題，形容事件是「MK仔大戰老奉阿婆」，感嘆香港人每日為座位吵架。有年輕網民則大吐苦水，慨嘆在香港「年輕是原罪」，稱自己也曾被無禮要求讓座。
