夫婦7仔增值八達通 不見增款$200反被扣剩$XX即崩潰 店方咁回應
增值八達通 不見增值反被扣款
事主在Facebook群組「7-11 x OK便利店香港關注組」發文，當日其丈夫在石塘咀美新樓的7–11便利店為八達通增值現金$200，及後乘巴士回家時竟然見到餘額剩下$12，驚覺八達通增值不成功，甚至連本身$200餘額亦消失了，強烈懷疑「男店員將我老公張卡入邊嘅$200 都扣咗出嚟」。隨即二人搭的士回到該間便利店，店員雖即時退還現金$200，但八達通本身的$200餘額就不予退還，對方表示「要等八達通公司處理」，事主隨即報警處理。及後，事主又走到港鐵站服務台投訴，港鐵職員亦建議事主報警。深感不忿的事主二人再次回到涉事便利店，要求即時退還款項，但便利店職員就堅持被扣款項「要等八達通公司處理」。而時至上周三（14日），事主仍然未獲得退款。事主終於忍無可忍，於上周四（15日）在Facebook發文，而發文翌日就馬上收到7-Eleven主動聯繫退款：
「我投訴完上咗Facebook，跟住第日個店員就打畀我攞返$200啦，你話有冇咁蹺呀？」
網民強烈建議要攞收據
保留收據並即時檢查餘額
不少網民普遍提醒在便利店增值八達通時必須小心，強調保留收據及即時確認餘額的重要性，以免發生錯誤：「收據真係好重要」、「入錢後，即時睇到打出結餘錢才離開」、「唔係淨係7-11，好多地方都會收錯錢，所以攞返收據好緊要」、「所以咪話去邊到買野增值都要攞收據，唔攞收據都要自己睇清楚係入咗錢定扣咗錢」
質疑八達通及便利店系統問題
有部分網民對八達通系統及便利店的操作表示質疑，認為系統可能存在漏洞，並建議使用其他方式增值或檢查餘額以確保安全：「八達通成日都食錢，有啲餐廳已經唔用又話收唔返錢」、「自己用手機增值最安全又方便」、「落地鐵站嘟部機，即時睇返餘額剩幾多就隱陣啲」、「淨係睇張單話便利店扣200，其實好難證明你係咪其他便利店買嘢扣，因為八達通增值唔可以扣返八達通嘅」。
目擊者大爆內情 心痛職員被無故懷疑
有網民自稱是目擊者，訴說事件詳細內情。目擊者表示，事主返回便利店後，該名職員就馬上拿出現金$200退還給事主，並解釋「啱啦，你返嚟啦，頭先增值唔到」，然而事主二人卻不分青紅皂白，馬上破口大鬧該名職員，指控他偷錢，「做手腳係八達通扣咗佢200」。縱使當時有名女職員介入叫事主「冷靜啲，了解下發生咩事先」，但事主仍然情緒激動地指控對方偷錢。後來經了解，職員表示多年來都未遇過如此情況，建議報警處理，同時職員亦表示已通報給店舖主任，「（要）等上面嘅人處理，因為未試過發生呢啲事，店舖無任何嘅交易紀錄，清機又無多錢，但又扣咗200，店舖都處理唔到系統同八達通嘅嘢」。而事件發生達3個星期，目擊者憶述有時經過都會見到事主在店內催促退款，惟店家管理層仍然未有進一步處理。對於該名男職員無故被指控，目擊者表達其憐憫之情。
「其實我都明白事主嘅心情，但我見到員工都好無奈俾人屈偷錢，7-11除咗俾個說法個客人，係咪都要安撫下員工嘅心情，作為一個大企業，員工經常性受到客人嘅無理辱罵，一有咩就話員工偷錢，高層又視而不見（利申，我都係做服務業）果個哥哥好好人，有特價雪糕或者係新嘢一定會推薦俾客，我見佢都做咗超過10年以上，見到佢呢排都好唔開心囉。」
7-11就事件作出回應
7-11回覆傳媒查詢解釋，事件中的顧客增值八達通時被錯誤扣錢，經調查後確認系統出現故障，已立即修正，及後已向受影響顧客退還款項，同時強調，八達通和八達通機在日常運作中，除非有交易，員工並不能從八達通卡扣錢。
