公屋戶斥被房署玩死 突封井型公屋「呢個位」裝防煙門：想焗死我哋？
房署為麗瑤邨加裝防煙門 封死一個位被住戶鬧「真係焗死」
在《一線搜查》報的報道中提到，有住戶指大約兩個月前，麗瑤邨樓梯位的落地大窗口被消防封起，繼而加裝防煙門及防煙窗，即使對此做法反映「好多餘」的意見，仍然無人理會。其中一住戶Ricky受訪中稱，於井型公屋加設防煙門根本多餘，認為「我哋山邊井字型設計，前後打通，本來就好通爽，但而家企一陣都出晒汗，其實呢個防煙門根本完全無作用，就算真係有火災，D煙已經可以喺咁大個嘅天井散走。但而家邊個行呢條樓梯，都會焗死，成件事根本係多餘，甚至係擾民嘅設施」。
而另一位住戶梁先生亦表示，「我間中都會自己去打開個防煙門，等空氣可以流通D，而家天氣咁熱，緊係要空氣流通，你起防煙門唔緊要，但唔好用玻璃呀嘛」。而節目組在現場可見，防煙門長期被綁着打開，或者用紙塞在門底，根本沒有關上，形同虛設。
居民反對無人理 房署：提供更佳逃生設備
加上加門前，已有住戶表示反對，但申訴無門，區議員又辭職，即使找社區主任亦無用，對方職員都指早已跟相關部門開會反映，但工程最終仍堅持「上馬」。而消防顧問梁錦得在訪問中表示，由於早年的公屋設計有不完善的地方，「當初做一個開放式走廊係因為當時認為有火災嗰陣，煙同火影響唔到走火通道。但後期發生過一D火警，證明喺某D情況下，煙都係有機會蔓延至樓梯」。而房署則指已就麗瑤邨進行消防改善工程前進行地區諮詢，強調加設防火門和防火窗是達到相關條例要求的標準，居民逃生保障更佳。
網民：真心唔明點解要蹝錢整
不過網民仍對此舉動表示不解，指「公墓園做嘢呢，神奇，頂級，超卓。完」、「老實講加門真係無謂，座嘢有3條梯，無論邊個位起火，最少都有另外兩條梯走，同埋d梯本身又唔係密封，加門好似好多餘」、「防煙門設計其實係令到平時唔會有人想去行樓梯，又要用力推幾次門，條樓梯又焗，等lift好過」、「原本好通風, 係都要搞到咁」、「井字型如果四邊密封 燒起上黎會唔會加劇煙窗效應」。
有人反嘲：咪咁無知啦
有自稱讀消防的工程師再於網上補充，指「根據BD2011，唔係用有煙同冇煙去定義一個大廈係fire safety定唔fire safety，佢地係用7個tenability criteria去決定，通常係用FDS去模擬幾耐時間個空間會fulfill唔到上面7個criteria，個個時間我地叫左ASET，之後用另一個軟件去模擬由大廈最頂去到安全區域需要幾多時間(Evacuation time)，個個時間叫RSET，再將ASET-RSET = safety margin ，一個大廈消防安唔安全就睇safety margin。想模擬d煙點走，燒幾耐先會影響到個大廈，真係要用FDS做simulation先知，仲要搵好幾個位擺fire load去做唔到既情況，唔係就咁講中間有個天井就冇用」。
