一人公屋裝修埋單30萬 全屋水泥無改過、設計被指無良心：KOL喎
一人公屋單位裝修被收30萬 女屋主：我真係覺得好離譜
公屋討論區中上傳了一段影片，影片來自YouTube Channel《HUMA LO》，片中訪問了涉事的女當事人，指當初見到該名裝修界KOL拍了不少影片上載，深信對方公司「係有心幫人整好間屋」，於是便光顧這間公司，但結果雙方鬧交收場。女屋主指，自己「咩都唔識」，起初報價20萬，但後來在畫圖時「溝通到嘔血」和其他因素下，竟由20萬變30萬埋單，期間女事主更指被對方發脾氣，「佢話我改太多要收錢，我問返佢，你話你會幫人做好一間屋，我就係想住得舒服先改圖，如果我無理取鬧你收錢，我OK，但而家唔係啊嘛，我住到個心都唔舒服」。
另一裝修師傅上門驗屋發現問題多多：可唔可以畀返啲良心
片中的裝修師傅為昌師傅，他指自己當初上樓是幫客人驗樓，惟到場試洗衣機時，突然「嘔水」要即時出手急救，事後發現原來屋內錯漏處處，相當睇唔過眼，問題如下：
1.廚房
昌師傅指，廚房的櫃門明顯錯方向，因洗衣機在左手邊，正常工程而言，旁邊的櫃門「鉸位」應設在靠近洗衣機方向，以色打開門時會被洗衣機阻隔。但懷疑裝修公司貪方便，把鉸門設在另一方。同時，洗衣機應有插蘇位插電，但當時發現對方「做漏咗」。他指，最過份的是去水位，廚房用了雙重隔氣，認為同行都知雙重隔氣會去不到水，結果漏到一地都是水。
2.洗手間座廁頂洗手盤
另一個離奇位，師傅指不解為何在座廁後方要有一個鋼櫃，把座廁「成個頂咗出嚟」，以他的身型為例，坐下如廁時會頂到洗手盤。他指「你可能係想整個位放嘢，但有其他方法，而家咁整，除咗頂位，仲要封實晒啲喉，萬一喉管有咩事係睇唔到」。他又指，鹹水喉位置做太出，萬一跌重物會容易壓斷。
3.冷氣機燈槽
而令他不解的，還有冷氣機槽。他指，一般做冷氣機槽是為了遮掩喉管，但屋內的冷氣機喉管並非向下走，而冷氣機喉管亦暴露左手邊靠窗位國，完全不明其用意。而燈槽的開關掣又藏於另一位置，不方便開關。他指「呢個燈槽位都用咗成萬蚊」。
除此之外，師傅更指「櫃又裝到高高低低、窗邊要落批灰鋼又無、櫃門位置又唔啱」，認為屋仔細細竟可看出如此多的問題。而價錢方面，他指「呢間公屋100幾呎，廚廁、泥水都無郁過，最多係整櫃，合唔合理呢30萬」。而女屋主再補充，指雙方溝通期間完全沒有在現場談過設計圖，「同自己去大陸訂傢俬差唔多，大陸畫圖，香港跟圖」，籲同行「畀啲良心」。
網民：30萬做到咁樣衰
而一眾網民都紛紛留言，指「咁樣包不鏽鋼真係黐線又樣衰， 你設計得出畀個客本身都有問題啦」、「今時今日，邊有人用咁多不鏽鋼，真係似公廁」、「全間屋都係黑心設計，無樣嘢睇得」、「最緊要係難維修，1人單位防水乜都無做，收30萬真係好癲」、「佢好多口頭禪，話最緊要開心，好多嘢佢心情好話做埋畀我哋，送畀我哋，然後冇同佢啲同事講，做完之後無啦啦話要收錢，我哋問當時話送嘅，點解無啦啦要收費，佢就屈我哋貪小便宜，成日逼佢送嘢畀我哋」、「一人單位重要整部分體機 ，一漏水裝修彎曬， 啲裝修都唔使等20-30年，一年就同你收檔」。
亦有網民提醒「講真業主自己都有責任要跟，想當年搵出面公司裝修都真係同啲師傅跟得好密同溝通得好密，唔識搵啲有經驗過屋企裝修嘅朋友一齊上單位睇吓裝修啲位或者進度有冇問題，睇到有咩唔對路或者甩漏要即刻同師傅傾，就可以避免好多問題。因為到最後住嘅係自己，自己都唔緊張，人哋喺唔會同你緊張的」。
