18歲DSE生棄升學高調宣布入行 一句神回覆KO所有質疑

18歲重考生棄升學修讀保安課程誓言戰勝荒謬

事件源於昨日（1日），該名18歲樓主於Threads發帖，附上一張課堂筆記相片，桌面放著「QASRS基礎保安訓練證書課程（資歷架構第一級）」教材，旁邊擺著一支筆同一樽茶，擺明已經坐定定上緊堂。翻查樓主過往帖文，佢曾於今年4月寫下重考DSE後嘅感悟，揚言要挑戰「DSE垃圾制度」、學識理財達至財務自由、買得起樓甚至移民，誓要戰勝世界種種荒謬。短短數月後，佢似乎已經揀定跑道——以「專業保安」作為實現目標嘅起點，認為月入兩萬已經「夠洗」，毋須行冤枉路。

網民群起公審質疑浪費青春女友睇唔起

事件曝光後，大批網民替事主不值之餘亦群起質疑。有人直斥「行少50年彎路，但浪費50年青春」，亦有人實際地追問「做保安？你女朋友睇得起你先算？」，更有網民提醒保安行業正面臨外勞競爭，前景未必如想像般穩陣。不過，支持者同樣唔少，有從事設計30年、疫情後轉行做保安嘅過來人大讚樓主有遠見，亦有年輕網民上載自己DSE後入行嘅保安許可證互相呼應。更有人貼出大學學生證疊住保安牌嘅相片，戲稱保安牌係高學歷人士嘅終極「安全網」，惹嚟一片笑聲。

樓主淡定神回覆一句KO所有質疑排緊公屋

面對鋪天蓋地嘅批評，樓主逐一灑脫回應。被指「浪費青春」，佢輕描淡寫反擊：「返工都係浪費青春」；被問係咪放棄改變世界，佢坦言：「以我能力返其他工都唔會改變到世界」；至於感情問題，佢直接拋出一句「唔洗擔心，我冇女朋友」輕鬆化解。對於外勞競爭嘅憂慮，佢反指「入緊外勞咪代表缺人」，反映行業空缺充足。樓主更透露自己已經輪候緊公屋，即使全職保安難以申請, 亦表示「咁繼續住我屋企」，似乎早已將退路計算在內。對於網民大讚佢「吊打同齡人」，佢只係淡然回應：「每個人想要嘅嘢都唔同，冇話吊唔吊打。」