電車花束女跨閘狂奔片瘋傳 為慳3.3蚊定趕住拍卡？結局竟然係⋯

花束女跨入三腳棍閘門到站即衝落車狂奔

影片由網民上載至Facebook群組「車cam L」，片段接近1分鐘，拍攝到一輛電車當時正沿黃泥涌道往跑馬地方向行駛。車上一名手持花束嘅女子企喺車尾上車位置，行車途中竟然將雙腳硬生生跨入舊式三腳棍閘嘅狹窄空間內，明顯係為落車做準備. 當電車駛至樂活道站車門一開，女子即刻越過閘門通道飛身落車，之後全速向車頭方向跑走。上載影片嘅樓主質疑「呢架叮叮車嚟㗎，都係2到3蚊啫」，暗指對方搭霸王車，但就無交代拍攝日期同時間。

網民鬧爆為慳3蚊搭霸王車直斥行為肉酸

事件曝光後，大批網民替叮叮公司不值，群組即時洗版。有人狠批「真係肉酸」，亦有人嬲爆「電車車費已經唔多，嗰兩三蚊都仲要呃」，認為呢種行為絕對唔可以姑息，應該要報警處理。有網民更質疑「睇衣著唔似窮人」，偏偏「有錢買花無錢搭車」，幾蚊車資都要走數，實在令人側目。亦有人批評「咁大個人都唔交代聲，就真係好無品」，認為就算真係無錢，最起碼都應該同車長講一聲，而唔係靜靜雞跨閘走人。

影片最關鍵一刻截斷網民兩極激辯結局成謎

不過，亦有網民睇完片後持相反意見，認為事件好大機會係誤會一場。有人指出「片中個女人如果諗住走數，就唔會跑向車頭方向」，估計佢係因為車廂太迫、又拎住花束，先選擇從後門落車再跑去車頭拍卡付款時。有住港島嘅街坊亦幫口，話「前面好迫人又趕住落車，後面落會方便啲，之後都會去前面嘟返」，又指「佢跑得咁快應該係怕部車隨時會開走」。可惜影片偏偏喺女子跑向車頭嗰一刻就完結，無影到佢最終有冇拍卡繳費，有網民更質疑「又唔影埋佢衝去邊，大概率係片主有心誤導」。真相到底係搭霸王車定係趕住付款，至今仍然無人知曉。