灣仔茶餐廳餐牌鬼畫符爆紅｜網民改咗個名全場笑翻

食客Threads發文展示一筆過鬼畫符餐牌

事件源於一名食客於Threads上載了灣仔會展港灣茶餐廳的手寫餐牌照片，只見整塊餐牌上的文字龍飛鳳舞，每隻字幾乎一筆過完成，筆劃之間完全無斷開.餐牌內容其實是一個108元的精選套餐，包含鰻魚飯、配麵豉湯及芒果糯米糍，但要完整解讀出嚟，確實需要花上一番功夫。該食客發文時亦忍唔住問：「呢個係咩字體？」當中最容易辨認的是「鰻魚飯」三個字，其餘部分就要靠眼力同聯想力慢慢拆解，甚至有人話淨係睇得明「鰻魚飯同108」，個「芒果糯米糍」得個「果」字認得出。

網民群起改名戲稱為古天樂體

事件曝光後，大批網民睇完即刻聯想到藝人古天樂招牌式的「薯片串」簽名風格，紛紛留言笑稱「同古生簽名有得揮」、「好似古生個簽名，只係呢個會轉彎，古生一路簽落去」，正式將該字體封為「古天樂體」。除此之外，亦有網民創作出其他名稱，包括「鰻魚體」、「泡泡字型」，甚至有人搬出AI分析話係「龍飛鳳舞現代藝術體，啲字全部一筆過，滲入咗藝術成份」。更有網民笑言「吃那1個精選套餐一定要經歷考驗，咁易食到點得」，又有人打趣話「寫字人一定好多嘢糾結緊」、「佢之前係中醫，失業後過咗嚟開工」，令成個討論區充滿歡樂氣氛。

評價兩極有人讚靚有人彈難認

雖然大部分網民都以搞笑態度睇待呢塊餐牌，但對於其實際觀感就出現兩極評價。讚好一方認為字體其實寫得幾有美感，留言話「最勁係真係睇得明」、「欣賞佢啲字寫得好靚」、「寫到咁唔簡單，幾靚」，甚至有人形容「吸到睛但係又唔會睇唔明，其實寫得幾好」。不過亦有網民認為餐牌始終係畀客人睇，如果大多數人無法即時理解內容，就失去咗推介套餐嘅意義，直言「有啲藝術性係好事，不過稍微要令到大多數人可以睇到明比較好」。有趣嘅係，只有價錢「108」係用正常數字清晰寫出，網民笑言「只有價錢不能用藝術表現」，似乎寫餐牌嗰位都深明收錢嘅事絕對唔可以含糊。