手機接Job發帖賺$50 網紅公司疑爆煲 79人追數無門

發帖賺$50完工後30日未見錢影

涉事P公司透過手機App平台招募Freelancer，為品牌喺社交媒體發帖或拍片宣傳，發一個帖文約賺50元，拍片則由數百元至千幾元不等，完成後可喺App申請提款，公司承諾30個工作天內過數.2023年至2024年初，出糧尚算準時，但自今年1月25日起，多名接Job嘅自由工作者申請提款後一直未能收到款項。受害者C小姐及L小姐透過朋友介紹接單，分別被拖欠約2,700元及5,077元，追討多次只換來「財務放假」、「太多人提款」等機械式回覆，完全冇實質進展。C小姐大呻追咗成個月，每次回覆都似AI生成，根本冇人認真處理。

79人中伏群組洗版齊聲追討血汗錢

事件曝光後，大批苦主喺網上群組洗版控訴，據統計最少79人聲稱被拖數，涉及總金額超過20萬元，當中有人更表示已苦等足足6個月仍未收到分毫。網民紛紛鬧爆P公司「有汗出冇糧出」，呼籲其他人千祈唔好再接呢間公司嘅Job，以免繼續中伏.唔少苦主形容自己好無助，做完嘢卻追討無門，公司回覆永遠得個「拖」字。事件迅速引起關注，多人已經報警處理。

公司欠租人去樓空CEO承諾兩個月內找數

記者追查發現，P公司荔枝角註冊地址原來只係一間秘書公司，而早前租用嘅銅鑼灣利園共享辦公室亦因欠租被趕走，香港業務實際上只剩銷售人員，財務團隊設於台灣，業務已轉移至新加坡總部。新加坡總部行政總裁回覆承認正重組虧損業務及調整現金流，導致出糧延遲，但強調「目前無清盤打算」，承諾兩個月內清還所有香港Freelancer款項。警方表示接獲多宗報案，部分報案人已收到全數或部分款項。律師指出網紅工作多屬合約關係，事主可向小額錢債審裁處提出申索追討欠款。