23歲綜援女$960買Bra後反鎖阿媽追債 一句話揭驚人分戶部署
母親答應付款後臨時反悔觸發導火線
事主自稱15歲起患有抑鬱躁鬱，與母親同住並領取綜援. 日前兩母女行街期間，事主在一間矯型內衣店試身後看中一款售價$480的胸圍，店員以「買二送一」即$960三件的優惠推銷，母親原本答應付款，卻因為覺得「攞綜援確實貴咗啲」而臨時縮沙. 事主大感不滿，認為自己全屋似樣的胸圍不超過兩件，買多三件並不過份，最終自掏腰包動用傷殘津貼$960埋單。回家後她越想越嬲，由於自己先到家，索性反鎖大門將母親拒諸門外，更在WhatsApp發出最後通牒：「欠債還錢天經地義，唔還就唔好入家門。」事主透露母親私下仍欠她八千多元，強調自己只想追回$960。母親回家見門被反鎖頓時爆煲，入屋後情緒激動到翻出回鄉證揚言「返大陸」，甚至衝落樓向朋友借錢還畀女兒，場面一度失控至社工需要介入調解，母親最終在欠款中扣除1000元歸還事主。
事主連登發帖問「我錯晒」惹網民群起鬧爆
事件曝光後，大批網民對事主的消費態度極為反感，有人直斥「明知窮到攞綜援，你好意思學人講要啲似樣嘅bra，有得著已經夠啦」，亦有人慨嘆「愈窮嘅人愈覺得自己有要求買『似樣』嘅用品係大條道理」。打工仔更加火滾，留言鬧爆「我交嘅稅就係養啲咁嘅人，日做夜做供養呢班人真係唔抵」。更有網民化身「福利專家」為事主算了一筆賬，指出憑著傷殘證明加上今次吵架分戶，一旦升級做單身人士，每月標準金額加社區生活補助金基本能落袋達$4,760，年收入達$57,120，若過渡期未上到公屋仲可以有租金津貼實報實銷，嘲諷事主堪稱實現另類財富自由。
事主親自回覆一句話令成個討論區嘩然
本以為事主會低調回應網民質疑，豈料她在帖文中毫不諱言地親自回覆：「精神病分戶，一人一間公屋。」這句話令整個討論區再度沸騰，網民紛紛嘲諷事件背後可能隱藏著一個完美的「公屋與綜援升級套利指南」，有人更直言「兩條友做場戲又可以呃多間公屋」。事主最終宣布與母親辦理綜援分戶，以獨立身分領取援助金，並在網上質問「究竟係咪我錯晒？」，但網民顯然並不買賬，認為整場胸圍風波不過是一場精心部署的分戶大計。
