中學生搭紅Van八達通冇錢被當眾羞辱 司機一句話秒殺西裝友

西裝友當眾斥責學生仔「冇錢就落車」

事件由一名目擊者於社交平台Threads發帖揭露。樓主憶述前幾日搭紅Van往旺角途中，一名中學生上車拍卡時八達通餘額不足，機器即時發出警示聲響。少年面紅耳赤，一手拎住iPhone、一手狂摷書包搵銀，場面已經相當狼狽。豈料後方一名西裝友開始表現極度不耐煩，竟當眾向學生開火：「喂，冇錢就落車啦，阻住晒！」戴住AirPods嘅少年被當眾單打，尷尬到幾乎想喊，全車氣氛瞬間跌至冰點。

事件曝光後網民群起鬧爆西裝友冷血無情

事件曝光後，大批網民替事主不值，紛紛鬧爆西裝友冷血無情。有人直斥「著住套西裝就大晒？對住細路都咁刻刻薄」，亦有網民感慨「邊個後生時未試過冇錢嘅窘境？」留言區幾乎一面倒聲討這名乘客，認為對一個未成年學生如此咄咄逼人，完全缺乏同理心。同時，大量網民將焦點放喺小巴司機身上，大讚佢「有情有義」、「呢個司機好難得」，更有人指出香港人睇落冷漠，內心充滿熱血，關鍵時刻總有人願意主動伸出援手。

司機霸氣護短塞硬幣送出人生金句

正當全車沉默之際，小巴司機擰過頭，好大聲喝住西裝友：「你冇細個過咩？邊個未試過冇錢？佢嗰份我請，你唔想等可以落車！」一句話即時秒殺對方，西裝友全程再無出聲. 更令人動容嘅係，落車前司機將一個硬幣塞返落少年手心，叮囑佢：「細路，大個咗有能力，幫返其他人就得。」樓主目睹全程後自我反省，坦言平時自己少少事就躁底，同西裝友根本冇分別，「突然明白咩叫真正嘅大個」。雖然有網民認為故事「戲劇成份幾重」，但當中傳遞嘅善良與同理心，依然令大批網民留言表示「聽完感動」。