粉色藍莓內地爆紅！夢幻外表炒上$800/kg天價！網民瘋搶專家卻揭驚人真相

內地驚現粉色藍莓炒上800蚊公斤天價專家證實真有其物

事件曝光後，有內地傳媒追查發現，呢款粉色藍莓並非憑空出現。農業專家證實，粉色藍莓確實存在，主流品種為「紅粉佳人」（Pink Lemonade），早喺2012年已經引入中國。不過由於生態適應性差、產量稀少，一直未能大規模種植。正因為物以罕為貴，導致有網民發帖大呻，喺網上買到嘅粉色藍莓鮮果，價格竟高達每公斤800元人民幣，簡直係當客係水魚！專家解釋，粉色藍莓嘅色澤係品種雜交選育嘅天然結果，並非後期染色或轉基因產物。

網民瘋傳營養價值高5倍專家踢爆純屬謠言並非通體粉紅

隨著粉色藍莓成為網絡熱話，唔少吹捧其神奇功效嘅講法亦隨之而生，當中最廣為流傳嘅就係「粉色藍莓花青素含量是普通藍莓的五倍」。不過，雲南省農業科學院專家和加衛就即刻出面踢爆，直指呢個講法純屬謠言！佢強調，花青素含量高低唔代表營養價值就更高，而且天然成熟嘅「紅粉佳人」藍莓，果實顏色其實係粉中帶紫，並唔係網上流傳圖片中嘅通體粉紅，提醒大家唔好盡信網上資訊。

鮮果難求樹苗網上熱賣專家急勸勿中伏揭種植一大難處

最令人意想不到嘅係，雖然粉色藍莓鮮果喺市面上極之罕見，但搜尋電商平台，反而會見到大量聲稱係「粉色藍莓」嘅樹苗熱賣。對此，專家就大派定心丸，急勸市民切勿盲目跟風購買！專家指出，「紅粉佳人」品種唔可以自花結果，需要異花授粉，加上喺好多地方試種後掛果率都極低，家庭盆栽嘅成功率微乎其微。業內人士更警告，市面上嘅樹苗好可能只係營銷噱頭，甚至有商家用普通藍莓苗冒充，大家隨時買棵樹返去都係得個吉！