澳門外賣42元馬蹄蒸肉餅飯開盒傻眼｜馬蹄竟然係咁放

42元馬蹄蒸肉餅飯開盒驚見馬蹄「另上」

事主日前在facebook群組「澳門難食中伏團」發帖，講述自己透過外賣平台向某餐廳落單，除咗42元馬蹄蒸肉餅飯，仲叫咗一份約48元特價蒸飯同約19元蒸水蛋，三份餐點扣減優惠後實付約113元。點知一打開個飯盒，見到肉餅上面鋪住大大細細嘅馬蹄粒，驟眼睇仲以為係洋蔥粒，同傳統將馬蹄同絞碎豬肉拌勻再蒸嘅做法完全係兩回事。事主無奈大呻：「肉餅有肉餅味，馬蹄有馬蹄味，不過係分開兩種味」，直斥餐廳出品毫無誠意。

飲食業行內人都睇唔過眼網民鬧爆餐廳馬虎

事件曝光後，大批網民替事主不值，留言區即刻洗版。有從事飲食業嘅網民直斥餐廳離譜：「我做咁多年廚房都未見過馬蹄肉餅可以馬蹄另上」，亦有人揶揄「唔知以為蒜頭蒸肉餅」、「切成咁，應該唔係預製菜」。更有網民推測餐廳係預先整好肉餅雪起，有單嗰陣先睇單寫乜就放乜上去蒸，貪方便到極點。唔少人仲以幽默方式諷刺餐廳「符合商品說明」，話「真係有馬蹄有肉餅喎」、「論標點符號嘅重要性——馬蹄、肉餅」、「擺落口自己搞勻佢」，笑中帶嬲。

曾光顧食客踢爆食物質素極差紛紛勸退

除咗馬蹄蒸肉餅飯中伏之外，有曾經幫襯過涉事餐廳嘅食客亦現身留言區踢爆，話間餐廳食物質素一直都係「趕客」級別。有人大呻前一晚先食完就忍唔住畀差評，指蒸雞勁多碎骨，每一啖都咬到碎骨根本無法入口，而且飯粒硬到離譜，最終成盒直接掉咗。另有人批評該店燉湯味精極重，整體出品完全唔合格。事件持續發酵，涉事餐廳被網民標籤為「中伏黑店」，成為群組內又一經典反面教材。