鑽石山MMA｜眼鏡漢1打2推跌情侶！猛撞男友埋牆再鬧「你條女多嘴」 驚人結局曝光

疑不滿被寸即發狂連環推撞情侶

根據影片內容，當時該名藍衫漢與一名背部有紋身嘅男子正在激烈對峙。紋身男不忿女友被推，大聲高呼：「你打我咪得囉！你𠵱家打女人呀！」藍衫漢聞言即刻火遮眼，怒吼反擊：「我𠵱家睇你唔順眼呀……你條女多嘴呀！」話音未落，佢就一個箭步上前，用盡全身力氣將紋身男大力推向旁邊嘅牆柱。紋身男大叫：「大家見到啦，佢郁手呀！」但藍衫漢未有收手，再次出手將對方推向牆柱，女方見狀即刻喝止：「喂，你唔好再郁手郁腳啦喎！」

影片瘋傳網民鬧爆斥兇徒蝦蝦霸霸

事件影片在網上曝光後，隨即引發網民洗版式討論，大批網民睇唔過眼，群起鬧爆該名藍衫漢行為離譜，恃強凌弱，「郁手打女人最唔要得」、「EQ低到咁學咩人出街」。不少人亦大讚在場挺身而出嘅熱心途人，以及夠薑護女友嘅紋身男，「個男仔保護條女，好Man」、「好彩有幾個正常人幫手咋」。不過，亦有網民認為事出必有因，想知道究竟情侶二人講咗啲咩激嬲對方。

警方列作糾紛處理無人受傷惹熱議

正當網民熱烈討論之際，事件嘅驚人結局亦隨之曝光。警方表示，在中午12時45分接獲一名33歲姓樊男子（即片中紋身男）報案，指與31歲姓陳女友在鑽石山站轉車時，遭一名41歲姓余男子（即藍衫漢）大聲吆喝，擔心對方施襲而求助。不過，人員到場調查後，相信無人打鬥，亦無人受傷，最終將案件列作「糾紛」處理。呢個結局令唔少網民大跌眼鏡，質疑「推到跌晒落地都叫無人受傷？」、「咁都係糾紛？香港真係法治之都」。