屯馬綫車廂淪貨車綫｜兩人手推車搬紙皮入閘網民鬧爆

兩人手推車載紙皮塞爆屯馬綫車廂

有網民在Facebook群組上載相片踢爆事件，從照片可見兩名乘客各自推住手推車，車上堆滿大量紙皮，旁邊仲放有背囊同環保袋，物件體積明顯超出正常行李範圍，佔據車廂大量企位空間。樓主形容成個屯馬綫車廂好似貨車車斗咁，其他乘客被迫避開，場面相當誇張。根據港鐵附例規定，每名乘客只可攜帶1件長闊高總和不超過170厘米、任何一邊長度不超過130厘米嘅行李，而攜帶較大型物品更需要持有港鐵發出嘅有效許可證。

網民鬧爆質疑點入閘促港鐵加強巡查

事件曝光後，大批網民替其他乘客不值，帖文下方即時洗版式留言聲討。有人質疑「咁大件嘢點入閘？」，直指港鐵閘口把關形同虛設；亦有網民嘲諷「除笨有精，兩蚊車費入閘，賣紙皮收回20蚊」，揶揄當事人慳返叫車錢就搏懵用港鐵當貨運。更有人戲稱屯馬綫為「大型集體運輸公司」，認為港鐵長期對違規行李隻眼開隻眼閉，應該加派人手巡查車廂，嚴格執行附例規定，否則只會有更多人有樣學樣。

港鐵附例列明罰則惟執法力度惹質疑

雖然港鐵附例白紙黑字列明行李尺寸限制，攜帶較大型樂器或體育用品亦須持有效許可證方可登車，擅用車站插座或將腳放座位等行為更可被罰款$2,000至$5,000不等，但現實中執法力度一直備受質疑。今次事件再次反映港鐵對違規乘客欠缺即時阻截能力，有網民直言「有規矩冇人執，同冇規矩有咩分別」，促請港鐵正視問題，避免車廂繼續淪為免費貨倉。