深圳K11店員當眾辱罵顧客「窮X」 片段瘋傳後下場曝光

女店員門口高調叫囂嘲諷顧客「冇錢硬逛」

事件發生於5月28日，地點位於深圳南山蛇口太子灣K11 ECOAST南館一間名為「行星系統」嘅門店外。網上流傳片段顯示，一名身穿黑色上衣嘅女店員態度極度囂張，與顧客爆發激烈衝突期間，竟然高聲嘲諷對方係「窮X」，仲大聲叫囂話「K11係為上帝服務，唔係服務你哋呢類冇錢嘅人」。被辱罵嘅顧客當場反擊，但該名店員變本加厲，更疑似向顧客舉起不雅手勢，全程態度惡劣至極，令在場人士嘩然。

辱客片段網上瘋傳網民鬧爆店員「白鴿眼」

事件曝光後，大批網民替事主不值，紛紛湧入評論區猛烈抨擊涉事店員。唔少人嘲諷該名店員患上「身份悖論」，明明自己都只係一個打工仔，卻將商場嘅奢華環境同自身價值掛鈎，產生虛幻嘅優越感。有網民一針見血咁諷刺，指部分高級商場店員每日推銷名貴商品，月薪可能得幾千蚊人民幣，收工後一樣逼地鐵返屋企，呢種「狗眼看人低」嘅心態根本係精神匱乏嘅投射，留言區一面倒狠批涉事店員行為離譜。

母公司3日後急發聲明涉事店員即炒兼列入黑名單

面對一發不可收拾嘅公關災難，涉事商戶「行星系統」嘅母公司「山西極峰科技有限責任公司」於5月31日正式發表聲明回應。公司承認事件對顧客同公眾造成不良影響，對此深感愧疚。聲明澄清辱罵顧客嘅店員屬於第三方合作公司派遣嘅員工，事後已被即時開除，並永久列入企業旗下所有門店嘅錄用黑名單，意味佢再無機會踏入相關店舖工作. 公司亦已向受害顧客誠懇道歉，雙方目前正就具體補償方案進行商討。