沙田酒樓兩男設局「換單」屈婆婆埋數 結局一招反擊

兩男食飽扮埋單趁亂將單據移花接木

事發於本周三（20日），婆婆如常獨自前往沙田市中心一間酒樓嘆茶，被安排坐大枱與其他食客搭枱。同枱有兩名講廣東話帶口音嘅男子，起初相安無事，直到兩人食飽準備離開時露出狐狸尾巴。當侍應將結帳單據送到枱面，兩名男子刻意將自己嗰張單放到婆婆身邊，企圖魚目混珠。婆婆拎起自己張單準備去收銀處埋單之際，兩人即刻發難反咬一口，指控婆婆 “攞錯單”，明顯想施壓迫使婆婆硬食兩個人嘅帳單。婆婆頭腦清醒，認定自己張單後直接無視兩人嘅指控，行去收銀處成功結帳，完美拆解呢場騙局。

事件曝光後網民群起鬧爆兩男蝦老人家

事件曝光後，大批網民替事主不值，紛紛湧入留言區痛斥兩名男子嘅無恥行徑。有網民鬧爆：”當人老人痴呆吖！”節、”呢D賤種專蝦老人家”，更有人直斥兩人根本係想趁亂食霸王餐，仲要搵長者做 “替死鬼” 幫手埋單。網民分析指，兩人真正目的係趁婆婆拎住佢哋張單去收銀處時即刻閃人，既食免費午餐又令長者蒙受損失，手段極其卑鄙。帖文引來大量轉發，不少人標記家中長輩提醒小心提防。

婆婆一招反擊力保不失兒子籲搭枱要提防

事主兒子事後回想仍捏一把冷汗，坦言若換作其他反應較慢嘅長者，好大機會被兩人得逞，硬食多一份帳單而不自知。今次婆婆能夠全身而退，全靠佢一直清楚記住自己張單嘅位置同內容，面對兩人聲勢洶洶嘅指控亦企硬唔退讓。有網民感嘆 “最好揀唔使搭枱嘅位置食飯”，事主兒子亦呼籲大眾搭枱時務必提高警覺，尤其家中有長者獨自外出用膳，更應事先叮囑留意身邊可疑人物，以免墮入類似陷阱。