Uber客唔見手機！講好$350送回竟反口壓價$300 司機一招KO結局神反轉

港男凌晨遺失手機 講好$350送回竟臨場壓價$300

事主司機喺網上出Post怒訴，話喺一個落雨凌晨由中環蘭桂坊接咗3個男仔去旺角，車資$250。點知佢哋落車後，司機已經「吉車返咗港島」，先發現有客漏低手機。大約20分鐘後，失主用定位功能搵到手機再打畀司機，司機就話：「一係你畀300蚊加隧道費，我𠵱家即刻過嚟啦」，對方亦爽快答應。點知司機辛辛苦苦揸返去旺角，對方竟然想攞咗手機就走，仲引用Uber條款話「畀返50蚊你就得」，又威脅要向平台投訴封鎖司機帳戶。雙方一輪拉鋸後，失主只肯出$200，同行友人更兇司機：「你知唔知你𠵱家犯緊法？」。最離譜係，乘客一方事後喺網上承認，當初答應$350只係想「呃X佢過嚟先」，根本無諗過畀足錢！

網民群起洗版鬧爆乘客 撐司機做法大快人心

事件曝光後，大批網民替司機不值，喺討論區瘋狂洗版鬧爆乘客無口齒！「自己應承完人然後反口」、「嚟到再壓價，你呢啲根本就唔係人做嘅嘢」。對於乘客一方反咬司機「獅子開大口」，仲想告人偷竊，網民就更加睇唔過眼，嘲諷話：「的士司機咪攞咗去差館囉，點告人哋偷竊？」辦、「星期五凌晨落雨，350蚊其實叫正常偏良心價」、「如果我係物主，我會畀得好開心」。一面倒嘅評論都力撐司機，認為乘客為咗慳幾百蚊，連誠信都唔要，行為極度乞人憎。

結局神反轉！司機霸氣KO寧蝕$800送手機去沙頭角

面對乘客嘅無理壓價同威嚇，司機並無屈服，反而冷靜回應一句要將事件交由「專業人士」處理，然後即刻踩油走人！正當乘客以為司機私吞手機之際，司機原來係直接將部手機揸咗去全香港最北嘅沙頭角警署報失！司機事後計數，話自己為啖氣，寧願硬食來回隧道費、油錢同乘客本應畀嘅錢，總共損失約$800，歷時2個鐘，都要畀個教訓對方。呢個「攬炒」式嘅霸氣反擊，意味住失主如果要攞返部手機，就要自己山長水遠入沙頭角警署搞手續，成件事嘅交通費同時間成本，肯定唔止$350！