牛池灣阿婆偷2條蕉斷正！CCTV直擊全程 檔主當面對質結局竟然係…

CCTV直擊偷蕉全程事隔3日再斷正

事發在4月21日早上，從檔主公開的CCTV片段可見，該名阿婆先是揀了一梳香蕉正常付款，但找續後並未即時離開。佢竟然轉身行到另一邊，極速將貨架上另外2條香蕉放入自己膠袋，然後施施然離開。檔主早已睇佢唔順眼，怒斥「次次嚟都叫我畀個膠袋佢」。事隔短短3日，即 4月24日，該名阿婆再次現身，檔主即時上前，並拿出手機影片當面對質：「你知唔知你嗰日偷嘢呀？你嗰日偷我條蕉喎！」

影片曝光網民群起公審鬧爆為老不尊

事件在網上曝光後，大批網民替檔主不值，影片隨即在各大群組洗版！網民紛紛鬧爆阿婆的行為，狠斥「壞人變老」、「幾十歲人都為老不尊！」、「有圖有真相仲死不認，見識到不知廉恥可以到咩程度」。不少人認為檔主不應心軟，應該即時報警，「偷嘢就係唔啱，唔理係咪老人家」、「年紀大唔通唔使守法咩？」、「阿婆直頭驚都未驚過，將倚老賣老發揮到淋漓盡致」。

阿婆死口唔認反寸檔主你鍾意報警咪報

面對檔主有片為證的指控，阿婆全程表現淡定，不斷重複「唔係啩，無拎過你啲嘢」，更一度想扮無事發生，繼續揀生薑. 當檔主表明會報警處理時，阿婆非但沒有一絲悔意，更懶理地拋下一句：「你咪報囉」，隨即轉身離開。檔主被阿婆的囂張態度激到扎扎跳，只能眼白白睇住佢走人，最終決定將影片放上網，呼籲其子女「係你呀媽嘅叫佢以後唔好呀，唔該」。