泰國62歲男屋主客廳睇電視　轉頭驚見4米劇毒巨蛇盤踞嚇到奪門而逃

4米劇毒巨蛇突襲民居客廳屋主嚇到奪門而逃

事發於4月6日晚上約8時25分，地點係泰國呵叻府旺南喬縣一處民居。當時62歲男屋主正獨自喺客廳睇電視，轉頭嗰陣突然發現有條體型極大嘅眼鏡王蛇盤踞喺唔遠處。屋主事後表示當時被嚇得魂飛魄散，但為避免驚動呢條劇毒巨蛇，只能夠靜悄悄退至門口，然後伺機奪門而逃，並立即致電報警求助。當地警方與動物救援人員接報後迅速趕抵現場，喺屋內客廳搵到呢條眼鏡王蛇。

專業救援隊耗時15分鐘成功制服3公斤重巨蛇

經測量後，估計呢條巨蛇身長約4米、體重約3公斤，屬於體型極大嘅個體。由於眼鏡王蛇具高度攻擊性且毒液致命，救援人員唔敢輕舉忘動，全程高度戒備、審慎應對。救援過程相當驚險，專業人員需要運用特殊工具同技巧，最終耗時約15分鐘先成功將巨蛇誘入袋中加以控制。整個過程可謂步步驚心，稍有不慎隨時會被呢條劇毒巨蛇攻擊。

巨蛇已送返普蘭國家公園深山放生避免再擾民

呢條眼鏡王蛇事後已被送往當地嘅普蘭國家公園深山放生，確保遠離民居，避免再次滋擾市民。事件喺當地引起熱議，不少網民都為屋主嘅遭遇感到後怕，亦有人讚賞救援人員嘅專業表現。眼鏡王蛇係世界上最長嘅毒蛇，成年個體可達3至4米，毒液足以致命，呢次事件提醒大家要提高警覺，一旦發現類似情況應立即報警求助，切勿自行處理。