賤男峨眉山推馬騮落崖！雙手猛推仲要笑笑口走人 最終下場竟然係…

黑衣男突發難雙手猛推馬騮落崖仲要笑笑口走人

事發喺5月4日下午，地點係四川峨眉山景區嘅雷洞坪附近。從網上瘋傳嘅影片可見，當時一隻馬騮仔正乖乖坐喺懸崖邊嘅護欄上剝柑食，完全無攻擊性。點知一名身穿黑衣嘅男子突然由遠處衝埋嚟，二話不說就用雙手發力猛推，企圖將馬騮推落萬丈深淵！可憐嘅馬騮仔差啲就失足墮崖，嚇到即刻彈開。而呢位黑衣男行兇後，竟然仲笑笑口施施然跑走，態度極度輕佻，完全無當一回事。據悉，呢種馬騮係國家二級保護野生動物「藏酋猴」，男子嘅行為已經嚴重違法。

網民睇到眼火爆鬧爆行為等同謀殺要求嚴懲

事件曝光後，大批網民替馬騮仔不值，喺各大社交平台群組洗版，鬧爆該名黑衣男嘅行為「唔係開玩笑，係謀殺」！有網民睇到眼火爆，留言怒斥：「呢啲人心理變態，點解可以對生命咁冷血？」、「佢推完仲要笑，真係人渣中嘅人渣！」、「傷害國家保護動物一定要有交代，唔可以輕輕放過佢！」網民紛紛要求景區同有關部門徹查事件，必須將呢位冷血男繩之於法，為受驚嘅馬騮討回公道。

景區證實事件兼道歉官方懲罰被批罰得太輕

面對排山倒海嘅輿論壓力，峨眉山景區管委會喺星期四（7日）發出通報，證實事件，並指已核實涉事男子身份。景區指出，雖然該名男子喺調查期間已經認錯道歉，但其行為造成極其不良嘅社會影響，決定採取最嚴厲手段，將佢列入「不文明遊客黑名單」，重罰佢3年內禁止進入峨眉山景區。不過，呢個「重罰」就引來網民質疑，唔少人認為「罰禁足3年太輕」、「應該用《野生動物保護法》告佢，等佢坐監先啱！」，認為呢種懲罰根本無辦法阻嚇同類劣行再次發生。