港男旅行前公審女友！嫌行李箱放「1樣嘢」好嘥位 點知反被網民圍剿：抵你單身

港男發文公審女友堅持帶風筒嫌佔空間

事緣一位台灣男網民喺社交平台Threads發文，附上一張行李箱嘅相，相中清楚見到一個黑色嘅摺疊式風筒。佢向網民大吐苦水求評理：「脆友們評評理！女友說要帶吹風機，不覺得很鬧嗎？很佔行李箱空間，飯店的不能吹嗎？」。字裡行間充滿不解同埋微言，似乎覺得女友嘅堅持完全係多此一舉，一心諗住可以圍爐取暖，點知呢個舉動反而點燃咗網民，尤其係一眾女士們嘅怒火。

網民鬧爆唔體貼直斥風筒係女生命脈

帖文曝光後，大批網民非但冇撐事主，反而一面倒替佢女友不值，留言區瞬間被鬧爆留言洗版！唔少人狠批事主唔夠體貼：「她真倒楣，因為行李放了1支吹風機就要被你發文公審」、「已經委屈帶折疊式的，就不要再吵了！」。更有網民直接將風筒提升到「生命線」嘅層次，尖銳留言：「寧願不帶男友也不能不帶吹風機」、「吹風機是女生命脈之一，不能理解體諒還是單身愉快」。甚至有人開玩笑話：「男友都帶了，有差這1支吹風機嗎？」，諷刺意味極濃，直指事主嘅存在感仲低過一個風筒。

酒店風筒3大恐怖用途曝光連男網民都唔撐

點解一個風筒會引發咁大嘅迴響？網民隨即揭露酒店風筒嘅「3大死罪」，解釋點解堅持要自備。第一，酒店風筒風力超弱，好多仲要係「撳到手指廢」嘅按壓式設計，對於髮量多嘅女生嚟講簡直係噩夢。第二，有網民驚爆酒店風筒嘅恐怖衛生問題，指好多人會用嚟吹臭鞋、濕襪，甚至「吹一些很奇怪的地方」，諗起都覺得嘔心！第三，風筒品質參差，好易吹壞髮質. 就連男網民都加入戰團，表示理解女生長髮要顧及髮質同捲度，一部好用嘅風筒絕對唔慳得，勸事主「想清楚」，唔好因為一件小事影響旅程心情。