外賣員慘被偷食$76外賣！斷正阿叔竟掏出1樣嘢回應 網民怒轟：有錢買煙無錢畀？

黑衣男偷食外賣斷正竟淡定回覆食緊嘢

從長約1分半鐘嘅影片可見，一名身穿黑衣、操普通話嘅男子，正喺街邊座椅旁，旁若無人咁享用一盒外賣。外賣員見狀即時上前喝問：「喂，大佬，做乜X嘢呀你」。點知對方完全無被嚇窒，竟然施施然再食多一啖，先用普通話淡定回應：「吃東西」。外賣員隨即表明身份：「我的外賣來的喎」，並要求對方賠償外賣嘅 $76。呢位偷食男即時收手，將外賣盒蓋好，但之後就一直沉默不語，場面極度尷尬。

網民鬧爆有錢買煙無錢畀飯錢促報警

事件曝光後，影片即時喺各大群組洗版，大批網民替事主不值，紛紛鬧爆該名黑衣男行為可恥！唔少人認為外賣員太仁慈，直指「賠錢益咗佢，應即時報警」、「幾十蚊都偷，報警處理啦，唔好放過佢」。更有眼利網民留意到男子之後嘅小動作，嘲諷佢「有錢買煙無錢畀外賣」、「唔係啩，幾10蚊都冇錢畀？」、「兩個褲袋摷咗成個月」，狠批佢毫無悔意。

外賣員索償七十六蚊對方竟掏出呢樣嘢

影片最令人咋舌嘅一幕，就係當外賣員追討 $76 賠償時，該名黑衣男一直默不作聲，然後喺褲袋中左摷右摷。正當大家以為佢要攞錢之際，佢竟然只係攞咗一盒煙出嚟，望一望之後又袋返入褲袋，全程無再出聲，影片亦喺呢個無言嘅對峙中結束。究竟最後外賣員有無成功追討損失，抑或選擇報警處理，就不得而知，但呢位偷食男嘅奇葩行徑，已經成功辣㷫全港網民！