土瓜灣餐廳$56海南雞飯出事！港男數住食得6件雞 仲有4件係骨頭？

事主怒數$56海南雞飯得6件雞4件骨

事主在社交平台Facebook群組「香港茶餐廳及美食關注組」大呻，指自己光顧土瓜灣一間餐廳，叫了一客價值$56的海南雞飯，結果令佢極為失望。從相中可見，碟飯賣相確實麻麻，事主更詳細力數碟飯有幾「唔掂」：「雞有6件，其中4件幾乎係骨，加幾粒花生，仲有兩條白烚菜」。事主認為無論食物質素定賣相都完全唔合格，直斥呢個係佢食過「最唔掂嘅海南雞飯」，感覺完全係當食客係水魚！

網民圍攻狠批似廚餘不如買兩餸飯

帖文一出，隨即在群組洗版，大批網民替事主不值，紛紛留言鬧爆餐廳離譜！有網民抵死地嘲諷碟飯係「馳名海南廚餘雞？」，更有人直言「仲以為係剩菜」、「見到已經不開胃呢」，劣評如潮. 不少留言都認為$56食呢個質素完全唔抵，狠批「一分錢一分貨，將貨就價」，更有大量網民表示：「買個兩餸飯好過佢多多聲」，認為兩餸飯的份量同質素都遠勝呢碟「骨杉杉」的海南雞飯。

港男網上公審引熱議食物質素再受關注

事主今次將中伏經歷放上網公審，成功引發網民熱烈討論，不少人都對現時食肆的食物質素大感憂慮。雖然事件中餐廳未有作出任何回應，但帖文已廣泛流傳，變相令大眾對該餐廳的出品留下壞印象。有網民更笑言，廚師當日係咪「輸咗馬」，先會整出咁嘅水準，事件亦再次證明，在今時今日的飲食界，食物質素稍有差池，隨時都會被食客放上網公審，一鋪清袋！