忍足10年！公屋惡鄰噪音監視樣樣齊 報警無果 最終竟因1個荒謬理由搬走？

慘過坐監長達10年日日活在恐懼之中

事主大呻，自己嘅青春期並唔係喺玩樂中度過，而係長達10年嘅「噪音、言語暴力及無止境恐懼」。佢怒訴惡鄰每日都會大力砰門、製造無間斷噪音，更離譜嘅係，對方竟然安裝CCTV同門鐘cam，將事主一家嘅出入行蹤全天候監視，令佢哋每日出門都心驚膽顫，「好似俾人監視住咁」。事主一家試過忍讓、報警，甚至因其他事告上法庭並獲判勝訴，但滋擾問題始終無法解決，令佢哋嘅精神健康大受影響，苦不堪言。

網民群起圍插惡鄰傳授兩招KO方法

事件曝光後，帖文即被網民洗版，大批網民替事主不值，紛紛留言恭喜佢哋重獲新生：「恭喜你，終於鬆一口氣，唔使擔驚受怕！」、「10年真係好難捱，而家終於可以一覺訓天光！」有網民就鬧爆惡鄰行為離譜，更質疑對方在公眾走廊安裝CCTV已違反房署規定。亦有過來人分享對付惡鄰嘅另類方法，指「我個朋友用幾部電子佛經兩個禮拜就搞掂」，更有人教路「對付癲佬真係要比佢癲」，引起唔少網民讚好。

惡鄰反咬一口自爆搬走原因勁荒謬

正當大家以為事件告一段落，事主終於可以安樂瞓覺之際，劇情竟然出現神轉折！事主透露，惡鄰之所以會突然搬走，全因一個超荒謬嘅理由。從事主上載嘅錄音可以聽到，惡鄰竟然周圍同人唱衰，話係因為「隔籬屋住着個黐線嘅一家三口，喺度滋擾人」，所以先頂唔順被迫搬走！更誇張嘅係，有自稱係涉事鄰居嘅網民更現身留言區，要求事主「放過人放過自己」，雙方隨即展開罵戰。事主就反駁對方「真相就係你哋滋擾人然後掉轉話人哋滋擾你哋」，惡人先告狀嘅行為實在令人髮指！