挪威男露台賣Pizza竟大排長龍！90分鐘狂賣70個全靠「1招」慳返外賣員！

挪威男獨創吊籃外賣90分鐘狂賣70個薄餅

事件發生喺挪威奧斯陸一個住宅單位，有位男士忽發奇想，喺自家露台即叫即製薄餅，吸引大批街坊喺樓下大排長龍！從網上瘋傳嘅影片可見，男子同團隊喺露台密密手搓餅、落料、入爐，一出爐就將熱辣辣嘅薄餅放入籃仔，再用繩索慢慢吊落街，交到顧客手上！呢種「空中外賣」嘅畫面極度震撼，被網民形容為「真正嘅樓上舖」，短短90分鐘內就極速賣出70個薄餅，生意好到爆！

網民群起洗版大讚比外賣App更有儀式感

呢種前所未見嘅送餐方式曝光後，即刻引發網民群組洗版式討論！大批網民都睇到O晒嘴，紛紛留言大讚店主有諗頭，「呢種送餐方式比外賣App更有儀式感！」、「好有人情味，鄰里關係就係咁樣建立」、「成件事好得意，好似玩緊遊戲咁」。更有網民笑爆，話呢個方法實在太聰明：「連外賣送餐員嘅錢都慳返，高手！」認為店主成功將一個普通露台，變成一個充滿歡樂嘅社區焦點。

創意背後惹爭議網民質疑食物安全牌照問題

不過，喺一片讚好聲之中，亦有部分網民提出質疑，擔心呢種「露台廚房”嘅衛生情況。有人留言問：「有無食物牌照㗎？」、「咁樣喺住宅單位煮嘢食，油煙會唔會影響到隔離鄰舍？」認為如果想長期經營，始終都要符合當地嘅餐飲規管，確保食物安全同埋唔會對鄰居造成滋擾。雖然有少少爭議，但呢間「露台薄餅店」憑住驚人創意，已經成功喺網絡爆紅，成為最新熱話！