長沙2萬平方米零食天堂開幕！健力士認證全球最大 逾3萬5千款商品港人北上又有新目標？

逾3萬5千款零食列陣場面超震撼

呢間名為「零食王國」的超級零食店，上周五（17日）於長沙芙蓉廣場正式開業，單單係零售同體驗空間就已經超過1.2萬平方米，簡直大過標準足球場！場內匯聚全球約70個國家同地區的風味，商品款式多達3萬5千款，由懷舊小食到最新潮物都應有盡有。最特別嘅係，店內並非傳統貨架式陳列，而係劃分成十幾個主題空間，例如超壯觀嘅「零食長廊」、拉麵控必去嘅「泡麵之城」，以及飲品種類多到選擇困難嘅「水飲小鎮」，務求令大家每行一步都有驚喜，完全係「可買、可逛、可拍、可玩」嘅沉浸式體驗！

開幕即成打卡聖地全家大細都啱玩

事件曝光後，大批年輕人同家庭客蜂擁而至，場面墟冚！唔少人一入場就忍唔住瘋狂影相，喺各種特色零食擺設前打卡留念，相關相片同影片隨即在內地社交平台被瘋傳洗版. 有負責人更自豪表示，新店已經火速成為長沙的新地標。從現場相片可見，無論係情侶拍拖、朋友同行，定係一家大細親子樂，似乎都能夠喺呢個零食天堂搵到樂趣，難怪開業短短幾日就人氣爆燈。

唔止買嘢仲有得玩零食博物館超吸睛

呢個「零食王國」最屈機之處，係佢唔單止係一個賣零食嘅地方。場內特設「中國零食代表團」主題裝置，仲有一個小型零食博物館，透過各種展品同文字介紹，俾大家了解到中國食品工業嘅發展同演變歷程，集購物、娛樂同教育於一身。對於鍾意食又鍾意玩嘅香港人嚟講，呢個集齊超過3萬5千款零食、又有得打卡又有嘢學嘅「全球最大」零食店，絕對係一個極具吸引力嘅北上新蒲點！