8號風球返工有錢收？勞工處新例保障打工仔權益！落波後2小時內要返工？

8號風球預警即刻走得？落波後2小時內要返工真相

收到「預警八號」消息，好多打工仔都心急如焚想即刻衝返屋企。根據勞工處最新指引，僱主喺呢個時候應該以「僱員安全」為首要考慮，分批安排員工有序落更！如果你係懷孕、殘疾、住偏遠地區或者要搭船返屋企，更加有權獲安排「優先離開」！至於落波後嘅復工安排，指引亦都寫得好清楚。如果8號風球喺工作時間結束前3小時 or 以上取消，打工仔就要喺2小時內返到公司。但如果取消信號時，距離收工時間已經唔夠3個鐘，僱主就可以酌情處理，畀員工直接收工，唔使趕頭趕命返公司喇！

打風返工隨時被扣糧扣假？無良僱主惡行網民齊聲鬧爆

講到打風返工，最多人呻嘅就係薪金同假期問題！唔少網民都喺討論區鬧爆，話有啲無良僱主會趁機扣糧、扣勤工獎，甚至要求員工用自己嘅年假（AL）去抵銷因打風而損失嘅工時。根據勞工處守則，呢啲做法完全唔OK！指引明確指出，僱主「不應」因為惡劣天氣而扣減僱員任何工資或津貼，更加「不可」要求員工扣減年假、法定假或休息日。如果你係必須喺8號風球下當值嘅「指定人員」，老細仲要額外畀返「當值津貼」同「交通津貼」你，絕對唔可以當你老奉！

返工放工4小時內出事點算？原來一律當工傷僱主硬食

除咗薪津，返工放工途中的安全問題亦係關鍵！原來好多人都唔知，根據《僱員補償條例》，只要喺8號風球（or 以上）、紅黑雨或「極端情況」警告生效期間，打工仔喺返工前或放工後嘅「4小時內」，以直接路線往返屋企同公司途中唔好彩發生意外，一律都會被視為工傷！換言之，僱主必須承擔補償責任。另外，隨住在家工作（WFH）普及，守則亦建議僱主同僱員應預先傾好WFH安排，並要考慮員工屋企有冇停電、漏水等實際困難.各位打工仔記得袋穩呢份攻略，下次打風就識得點保障自己啦！