港女企巴士車頭一個位 手機意外「嘟」一聲即損失雙倍車資

屯公落斜一秒失重心手機觸碰卡機即扣錢

事主日前在社交平台發文大呻，指放工時間巴士班班爆滿，為求盡快返屋企唯有「夾硬」上車，結果被迫企喺車頭八達通收費機正前方。正當佢低頭專心睇手機之際，巴士駛至屯門公路落斜路段，車身劇烈搖晃令佢重心不穩，整個人向前傾，手中部手機就咁撞到八達通機，「嘟」一聲響徹車廂。車廂頓時鴉雀無聲，連車長都錯愕開口問佢點解要拍多次卡，令事主尷尬到想搵窿捐。事主上載第一身視角相片，可見八達通機近在咫尺，屏幕顯示$9.7車資，企喺嗰個位只要身體稍為前傾，手機或智能手錶就會輕易觸碰到卡機，堪稱巴士車廂內最危險嘅「破財企位」。

事件曝光後苦主狂湧現有人一程被扣三次錢

事件曝光後，大批網民替事主不值之餘，亦紛紛現身分享自己嘅慘痛經歷，帖文下方即時變成「苦主大會」。有網民表示自己同樣企喺車頭位，試過喺又迫又靜嘅車廂突然傳出「嘟」一聲，全車人望住佢。更有苦主大爆自己讀書時期一程車被扣足三次錢，當時仲係學生身份，形容「好肉赤」。另有網民指智能手錶同樣係高危物品，透露自己過西隧時手錶誤觸卡機，硬食多$24過路費，大呻「蝕入肉」。有網民搞笑獻計，話下次被車長問起可以霸氣回應：「冇，見你揸得幾好，想打賞下你」，惹來一片笑聲。

前車長證實頂閘時日常發生巴士公司設退款機制

有趣嘅係，帖文亦引來前任巴士車長留言證實，呢種情況喺多人到「頂閘時經常發生，乘客嘅手錶、掛喺胸前嘅八達通或手機都容易誤觸卡機。有現職巴士公司員工更自爆，自己著住制服企喺司機門旁邊，都試過因巴士收油向前衝而誤嘟咗$44車資，被同事笑到停不不到。若不幸中招，根據九巴及城巴官方資料，乘客只要記低巴士路線、車牌號碼、事發時間及八達通卡號，透過巴士公司官方應用程式或致電客服熱線反映，經核實後可安排退回多扣車資。使用電子支付嘅乘客需聯絡顧客服務部處理，現金支付者則可即場向車長或站長反映。