3歲仔深夜發燒截唔到車 Uber司機忍住尿意做一個決定

司機忍住尿意即刻載母子衝去仁安醫院

事發於5月16日晚上9時15分，港媽3歲兒子突然發燒，她心急如焚抱起兒子由沙田隆亨邨出發，打算截的士趕往仁安醫院。點知行到邨口完全無的士停泊候客，用App召車亦無人接單。港媽唯有繼續向前行，終於見到一名Uber Taxi司機泊低車準備去解手。司機見到港媽抱住戴晒口罩嘅小朋友，二話不說即刻叫佢哋上車，忍住尿意先載母子去醫院。更暖心嘅係，司機仲主動教港媽用pair & pay code優惠碼，即減20蚊車費，最終成程車費僅僅9蚊。

港媽Threads發文表揚獲網民一致激讚

事件曝光後，大批網民替司機大哥送上祝福，紛紛留言讚揚佢嘅善心。有網民感動寫道「救人一命，亦救了他人一家，謝謝你的士司機大哥」，亦有人分享自己類似經歷，話「呢個上次幫助過我，我先趕到見媽咪最後一面」。更有網民送上最真摯祝願：「祝福的士司機客人常滿、生意興隆、事事順利、身體健康」、「祝願呢位司機大哥支支大旗，泊車有瓦遮頭」，留言區洗版式湧現正能量。

港媽堅持畀現金貼士答謝天使司機善行

雖然車費只係9蚊，但港媽深知司機嘅善心遠超呢個價值。佢特意額外畀咗現金貼士，仲喺帖文寫道「當然大哥善心係值得我哋畀cash tips」，並感激表示「多謝呢位的士大哥，忍住都車我哋去醫院先」。港媽以行動回饋善意，呢段深夜互助嘅暖心故事，證明香港街頭仍然有令人窩心嘅人情味。