荔景大家樂晚市變補習社 學童霸2枱做功課遭公審 網民見一物即轉軚

學童校服未除即霸枱攤開課本溫書

該名女街坊於晚飯繁忙時段光顧荔景大家樂，本想搵位食飯，卻目睹至少3名小學生仍穿著校服，霸佔店內至少2張餐枱，桌面攤滿課本文具，旁邊更有成人在旁逐一指導功課。她隨即在Facebook群組「新•大家樂討論區」貼相，怒斥「幾張枱做了補習社，服嗎？」質疑快餐店淪為免費自修室，嚴重影響其他想安坐用膳嘅食客。

網民群起鬧爆霸位行為斥面皮厚

事件曝光後，大批網民替食客不值，紛紛湧入留言區開火。有人直斥「好多香港人都係方便自己」、「只要面皮夠厚」，更有網民憶述以前試過同樣情況，但當年經理會即場暗示「呢到係做生意㗎」趕人離開，質疑現時快餐店管理層點解唔出手處理。另有人將事件與日間長者霸枱現象相提營論，建議事主直接搵經理投訴，認為放任霸位只會令情況愈來愈猖獗。

網民發現枱上有外賣盒態度即時軟化

正當批評聲浪一面倒之際，有眼利網民留意到相中餐枱上擺放住大家樂外賣盒同飲品杯，證明學童並非完全「白坐」，確實有幫襯消費。風向隨即出現逆轉，有人留言「有幫襯就算數啦」，更有人替學童講說話：「屋企夠大又有書房，使鬼嚟大家樂做功課溫書咩」、「屋企有時太窄唔舒服，圖書館自修室又唔可以講嘢又唔可以食嘢」，認為小朋友可能有難言苦衷，勸喻大家多加體諒，「有頭髮邊個想做癩痢」。